भांगरभूंय | प्रतिनिधी
दर एका मनशाचीं जिवनांत कांय सपनां आसतात. तांतलें एक मुखेल सपन म्हळ्यार रावपाक आपलें घर आसचें. रावपाक बेस बरो निवारो तयार करप आनी ताचे खातीर लागता तें सगळे तरेचे कश्ट करपाची मनीस तयारी दवरता.
आमचो बाबा हो कश्टाळू मनीस. कितलेय त्रास काडचे पडले जाल्यार जाता. पूण दुसऱ्या कडेन केन्नाच लाचार जावचो ना असो ताचो निर्धार आसलो. घरचे कुळागर सांबाळून ताणें गायी, म्हशी घेवन दुदाचो धंदो केलो. कुळागरांतलीं कामां आपूण स्वताच करतालो. झाडांक उदीक दिवप म्हळ्यार ‘शिंपणें’ आदल्या तेंपार लाकडाचें बारीक पनेळ म्हळ्यार ‘कल्ले’ घेवन मागासल्या फोंडांतलें उदक झाडांच्या मुळार घालप. सुमनांतल्यान दोन खेप. गांवच्या न्हंयक मातयेचो बांध घालून पाटांतल्या उदक शिंपणावळी खातीर हाडटाले.
आपल्या भुरग्यांक शिकोवन व्हड करपाचें बाबाचें मुखेल सपन आसले. ताचे खातीर ताणें आपली हाडां झिजयलीं. पूण चारूय पुतांक पदवी आनी मुखारचें शिक्षण दिवपाची जिद्द पुराय केली. आमी गोंय मुक्ती पयलीं काळा सावन वाठादेव हांगासर नळ्यांचे पाखे आशिल्ल्या दोन पडव्यांच्या घरांत रावतालीं. भुरग्यांचें शिक्षण पुराय जावन तीं व्हड जालीं. चलयांचीं आनी चल्यांचीं लग्नां करपाची जापसालदारकी बाबान पुराय केली.
1995 वर्सा बाबान आपली गाडी आसची अशी मनांत बरीच वर्सा सावन आशिल्ली इत्सा म्हज्या कडेन एक दिसा पर्गटायली. आपूण ‘मारूती’ गाडी घेतलो हें तागेलें मनांतलें सपन. कितले दुडू जाता, चवकशी कर. हांव कर्ज बी काडचों ना. रोख दुडू दिवन गाडी घेतलो. आनी तांणी म्हाका फर्मान काडले. त्याच वर्सा आमगेल्या घरा मारूती (ओमनी) गाडयेचें येवप जालें. सगळ्यांनी उर्बेभरीत येवकार दिलो. आमच्या वाठादेव गांवांतली ती पयली मोटार गाडी म्हळ्यार सद्याचे भाशेंत ‘कार’.
कुळागरांतलो म्हाल म्हळ्यार केळ्याचे घड, पणस, आंबे, नाल्ल विकपाक बाजारा दिसा दिवचले व्हरपाक गाडयेचो बरो उपेग जातालो. म्हजो धाकटो भाव गाडी चलयतालो. गाडयेंत म्हाला वांगडा आमच्या घरा वावुरपी वामन दादीक गाडयेंत बसोवन वांगडा बाजाराक वतालो.
आमच्या भुरगेपणांतले गरिबीचे दीस दोळ्यां मुखार हाडले जाल्यार आमच्या घरा गाडी येतली हें खरेंच दिस नाशिल्लें. बाबान आमी रावतालीं त्या घराक आनीक दोन पडव्यो काडून तशेंच मातयेचे वणटीक प्लास्टरींग करून थोडी दुरुस्ती केल्ली. शिवाय बांयक पंप बसोवन घरांत उदकाची सोय केल्ली.
एक दोन वर्सांनी बाबान आपूण नवें घर बांदतलो अशें घरांत उलोवन दाखयलें. बारीकशेंच पूण सगळ्यो सोयी आसपाकूच जाय. आमच्या आईक फुलझाडांचो व्हडलो मोग. आंगणाची जागा इल्लीशी. पूण तेच जागेंत शेंवती, आबोलीं, मोगरीं आनी हेर फुलझाडां लावन सांजे वेळार कळशेन बांयचें उदक काडून झाडां शिंपताली.
नवें घर बांदता तेन्ना म्हाका मात आंगण व्हडलें जाय अशी मागणी आईन बाबा कडेन केली. पोरणें घर एका पुताक आनी नव्या घरांत तीन पुतांक रावपाची सोय करप अशें थारलें. आमच्याच गांवांत दत्ताराम शेटकर नांवाचो गंवडो बरो बांदकाम करतालो. ताका आपोवन हाडून घरा खातीरची जमीन रिस्कोन (मार्कींग) घेतली. 1998 सालांतल्या गिमाळ्यांतल्या दिसांची ही गजाल. मार्च म्हयनो चालू आसलो. रामनवमीच्या म्हुर्तार भुंयपुजन केलें. आमगेर कामांक येवपी म्हादेवान आनी एकाक वांगडा घेवन बुनयाद मारपाचें काम सुमना भितर केलें. बुनयादी फातर बसयलो आनी नेटान घराचें बांदकाम सुरू जालें.
पावस येवपा पयलीं घराचेर छप्पर (स्लॅब) पडपाक जाय अशी ताकीद बाबान गंवड्याक दिली. सकाळीं सात ते सांजे साडे सात मेरेन गंवड्यान काम करून दोन सुमना भितर स्लॅबा मेरेनचें काम पुराय केलें. ‘नागप्पा’ नांवाच्या स्लॅब घालपी कंत्राटदारान सेंटरींग आनी स्लॅब घालपाची जापसालदारकी घेतली. 40 दिसांचे मजगतींत 8 जून 1998 ह्या दिसा स्लॅब घातलो. “जाले, आतां घराचेर छप्पर पडलें. म्हाका कसलीच भिरांत ना!” अशीं उतरां उलोवन बाबान आपलो आनंद पर्गाटायलो. स्लॅब भिजोवपाचें काम म्हादेवान मना पासून दिसपट्टे सकाळ सांजे केलें. प्लास्टरींग, जनेलां आनी दारां आनी जमनीक कोटा बसयलो की घराचें काम पुराय जातलें अशे म्हणून शिमिटाच्यो देडशे पोतयो बाबान हाडल्यो. घरचे चिराऊ पणसाचें मदेन आसलें. मेस्ताक आपोवन जनेलां आनी दारां करपाचीं अशें थारायलें.
मजगतीं बाबा आमची कुलदेवी बांदोड्याची महालक्ष्मी, सावयवेरेंचो कुलदेव अनंत हांगासर वचून कुलदेव- कुलदेवीचें दर्शन घेवन आयलो. फोंडेंच्यान येतना तिनूय चलयांची भेट घेवन तांकां गृहप्रवेशाक येयात. तारीख मागीर फोनाचेर कळयतां अशें सांगून आयलो. आनी एक दिसा घरा म्हज्या कडेन उलयलो, आतां घराचें उरिल्लें काम कशें जातलें. हांवें म्हणलें कित्याक घाई करूंक जाय. रावपाक पोरणें घर आसाच. बाबाच्या मनांतली खंत म्हाका दोळ्यांत दिसली. ही गजाल जुलय 1998 च्या पयल्या सप्तकांतली. (6-7 जुलय दरम्यान) 8 जुलयक राती बाबा अस्वस्थ जालो. आमी दिवचले वचून डॉ. लेले हांकां घरा हाडून तपासणी केली. “कांय ना, म्हजो पेशंट बेस बरो आसा,” अशें डॉ. लेले उलयले. आमी दोतोराक पावपाक गाडी घेवन दिवचले गेले. आनी फाटल्यान बाबाक बरोच त्रास जावन ते अस्वस्थ जाले.
राती सुमार 12 वरांचेर आमचे वांगडा पेज जेवले. “हांव बरो आसां, तुमी सगळी वचून न्हिदात.” आनी दुसऱ्याच दिसा सकाळीं तांकां ‘हार्ट-एटेक’ येवन आकांताचें मरण आयलें. काळान तांचेर झडप घातली. त्या दिसा गुरूपौर्णिमा आसली. बाबा गेले आनी आमचो आधारवडाचें छत्र पयस जालें. त्या दुख्खांतल्यान सावरप कठीण काम आसलें.
सुमार दोन म्हयन्या उपरांत शिमिटाच्यो पोतयो घट्ट जावच्यो न्ही देखून घराचें प्लॅस्टरिंगाचें काम पुराय केलें, पूण नव्या घरांत पांय दिलो काय बाबाचे यादीन काळीज हाय जावन येतालें. म्हजो भाव दिलीपान म्हळें, दुमजली घर बांदपाक जाय. बाबाचें सपन पुराय करपाक आमी पूत उणें पडलें अशें जावंक फावना. आनी दर वर्सा फावता तशें, जमता तशें पांच वर्सां भितर घर बांदून पुराय केलें. एक्काय पयशाचें रीण काडूंक ना. कित्याक तर कोणा कडेन रीण काडप ना, बँकेचें लेगीत असो बाबाचो नेम आसलो. आमकां पुतांक तशी ताकीद दिवन दवरिल्ली.
2020 ह्या वर्सा नव्या घराचो गृहप्रवेश वास्तू शांती करून केलो. पूण वर्सभर जाल्यारूय त्या घरांत कायमचें रावपा खातीर पोरणें घर सोडचें अशें मनाक दिस नासलें कित्याक तर नवें घर हें बाबाचें निमणें सपन थारलें. घराचें नांव ‘श्रीविनायक’ अशें दवरून बाबाच्या ‘विनायक’ ह्या नांवाची स्मृती (याद) आमच्या दर एकल्याच्या मना काळजांत उरची असो हेत आसलो. त्या घरांत कांय दीस लेगीत बाबाक रावपाचो योग ताच्या नशिबांत नासलो. ही खंतीची गजाल. तांच्या उगडासा वांगडा मन पोखरून व्हरता… दोळे पाणावतात…
रमेश सावयकार
9637748974
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
