भांगरभूंय | प्रतिनिधी
वेवसायीक सिलिंडरातूय 350 रुपयांनी वाड, सर्वसामान्यांक फटको
भांगरभूंय I प्रतिनिधी
पणजी : घरगुती गॅस सिलिंडर दरांत 50 रुपया जाल्यार वेवसायीक गॅस सिलिंडरांत 350 रुपयांनी वाड जाल्ल्यान म्हारगायेचो उद्रेक जावपाचीं चिन्नां आसात. गोंयांत घरगुती गॅस सिलिंडर आतां 1,117 रुपया दिवन घेवचो पडटलो. वेवसायीक गॅस सिलिंडराचो दर 2,118 रुपया जाला. गॅस सिलिंडराचे दर वाडिल्ल्यान हॉटेलांतल्या खावपाच्या वस्तूंचें दर वाडपाचीं चिन्नां आसात.
6 जुलय 2022 उपरांत बुधवारा गॅस सिलिंडराचो दर वाडोवपाचो निर्णय जालो. ही वाड व्हड आशिल्ल्यान सामान्य मनशा सयत वेवसायिकांक हाचो फटको बसतलो. हे दरवाडी उपरांत विरोधकांनी सरकाराचेर टिका केल्या.
तारांकीत हॉटेलांत पदार्थांचे दर चड आसतात. कॅफे तशेंच हॉटेलांनी च्याचे दर 10 ते 15 रुपया आसा. वेवसायीक सिलिंडराची दरवाड पळयल्यार च्या चो दर 12 रुपया वा 17 रुपया करचो पडटलो. रायस प्लेटीचो दर 150 रुपया सावन सुरू जाता. हो दर लेगीत 20 रुपयांनी वाडोवचो पडटलो. वेवसायीक सिलिंडर दरवाड भरून काडपा खतीर हॉटेलांतल्या पदार्थांचे दर वाडोवचे पडटले. हाचो सामान्य मनशाक फटको बसतलो, अशें हॉटेल आनी रेस्टॉरंट धनी संघटणेचे अध्यक्ष गौरीश धोंड हांणी सांगलें. हॉटेलांनी प्री कूक फूड येता. हाचो दर लेगीत वाडटलो, अशें तांणी सांगलें.
आम आदमी पक्षाची फुडारी प्रतिमा कुतिन्हो हांणी गॅस दर वाडी खातीर केंद्र सरकाराचेर खर टिका केल्या. विरोधी पक्ष फुडारी युरी आलेमांव तशेंच विरियातो फर्नांडिस हांणी लेगीत सरकाराचेर टिका केल्या.
प्रधानमंत्री नरेंद्र मोदी हांचे फुडारपणा खाला भाजप सरकार भांडवलदारांच्या हिताचे निर्णय घेता. सामान्य लोकांच्या हिताचे सरकाराक कितेंच पडूंक ना. गॅस सिलिंडरा वयली दरवाड फाटीं घेवन हेर वायफळ खर्च उणो करपाची गरज आसा, अशी मागणी प्रतिमा कुतिन्हो हांणी केल्या.
हॉटेल वेवसायिकांकूय फटको
वेवसायीक गॅस सिलिंडराचो दर 350 रुपयांनी वाडिल्ल्यान हॉटेल वेवसायिकांक फटको बसतलो. हाचो परिणाम म्हूण खावपाच्या वस्तूंचे दर वाडोवपा खेरीत पर्याय उरचो ना. हाचो परतून सामान्य गिरायकांक फटको बसतलो, अशें हॉटेल आनी रेस्टॉरंट धनी संघटणेचे अध्यक्ष गौरीश धोंड हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
