भांगरभूंय | प्रतिनिधी
नवी दिल्ली: घरगुती एलपीजी सिलिंडर २९ रुपयांनी म्हारग जालो. हें नवें दर आयज रातच्या १२ वरांचेर लागू जाल्यात. आतां १४.२ किलो गॅस सिलिंडराची किंमत ९१३ रुपयां वयल्यान ९४२ रुपयांनी जातली.
तीन म्हयन्यांत दुसरे खेपे एलपीजीचे दर वाडल्यात. हाचे आदीं ७ मार्चाक एलपीजी सिलिंडराचें दर ६० रुपया वाडयिल्लें. अशे तरेन घरगुती सिलिंडर ३ म्हयन्यां भितर ८९ रुपयांनी म्हारग जालो.
खबरां एजन्सी पीटीआयच्या सुत्रांनी दिल्ले म्हायती प्रमाण आंतरराष्ट्रीय बाजारांत उर्जेचो खर्च वाडिल्ल्यान आनी देशांतल्या विक्रींत लुकसाण जाल्ल्यान तेल कंपनींक दर वाडोवचें पडलां अशें सांगलें.
एलपीजी पयलीं पेट्रोल, डिझेल आनी सीएनजीचें दरय वाडलें
फाटल्या कांय सप्तकांत पेट्रोल, डिझेल आनी सीएनजीचें दर वाडलां. मे म्हयन्यांत पेट्रोल आनी डिझेलाचें दर वट्ट रु. ७.५० प्रती लिटर वाडल्यात, जाल्यार सीएनजी सुमार ६ रुपया प्रती किलो खर्च जाला. कंपनींक पेट्रोलाचेर दर लिटराक सुमार ११ रुपया आनी डिझेलाचेर दर लिटराक ३३.६ रुपया लुकसाण जावपाक लागलां. ते भायर पेट्रोल आनी डिझेल अजूनय उत्पादन खर्चा परस उण्या दरांत विकतात असो दावो कंपनींनी केला.
संवसारीक दर वाडपाचो पुराय भार गिरायकांचेर पावूंक ना अशें सरकार म्हणटा. कच्च्या तेलाच्या वाडिल्ल्या दरांतलो कांय भार सरकारी तेल कंपन्यांकच घेवन वता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
