भांगरभूंय | प्रतिनिधी
नात्यांत दुरावो, कोडसाण येवपाचें आनी एक सामकें म्हत्त्वाचें कारण म्हणल्यार घोव- बायले मदीं आशिल्लो अहंकार.
लग्नाच्यो गांठी सर्गार बांदतात, अशें म्हणटात. आदल्या काळांत त्यो घट आसताल्यो, कारण आयुश्यभर तुटनासल्यो. इतलेंच न्हय, तर होच जोडीदार फुडल्या सात जल्मांत मेळचो अशी मागणी घोव- बायल देवा कडेन करतालीं. पूण हालींच्या दिसांनी लग्नाच्यो गांठी सैल बांदतात काय कितें, अशी दुबाव येवंक लागला; कारण आयुश्यभराचें सोडून दियात, पूण कांय वर्सां लेगीत लग्न जाल्लें जोडपें एकठांय रावपाक तयार ना. लग्ना उपरांत फकत कांय वर्सांनी तांचे मदीं वाद जाता आनी तो थेट घटस्फोटा मेरेन पावता. आज देशांतल्या न्यायालयांनी घटस्फोटाच्यो लाखांनी याचिका प्रलंबित आसात. दर दिसा तातूंत भर पडतूच आसता, घटस्फोटाची नवी याचिका दाखल जाली ना असो एकूय दीस उजवाडना. घटस्फोटाच्यो लाखांनी केशी प्रलंबित आशिल्ल्यान, 6 म्हयन्यांच्या भितर घटस्फोटाचो निकाल दिवचो, असो निर्णय न्यायालयाने घेतला. घटस्फोटाचे खटले रोखडेच निकालांत काडटात तरी तातूंत नव्यान भर पडत आशिल्ल्यान न्यायालय लेगीत हतबल जालां.
पळयल्यार, दोन दशकां पयलीं घटस्फोटाचीं प्रकरणां सामकीं उणीं आसतालीं. निमाणो उपाय म्हूण घटस्फोटा कडेन पळयतालें; पूण आज मात साद्या किरकोळ कारणां वयल्यान लेगीत घटस्फोट मागतात. आज न्यायालयांत दाखल जावपी घटस्फोटाचीं कारणां पळयल्यार तुमी चक्रावून वतले. बायलेक साडी न्हेसपाक येना, बायलेन केल्लें रांदप रुचीक नासता, बायल सदांच टिव्ही आनी मोबायलाचेर आसता, बायल मान दिना.. असल्या हास्यास्पद आनी मनाक न पटपी कारणांनी घटस्फोट मागप जाता. बायले कडल्यानय घटस्फोटाची अशीच कितें ना कितें कारणां येतात. घोव आपल्याक वेळ दिना, घोव फकत आपल्या आवय-बापायचेंच आयकता, घोव आपल्याक भायर भोंवपाक व्हरना, घोव आपल्या मना सारको वागना, अशीं हास्यास्पद कारणां दिवन घटस्फोटाची मागणी जाता.
घटस्फोटाचीं हीं किरकोळ कारणां जितकीं हास्यास्पद दिसतात, तितकींच तीं हुस्क्याचीं लेगीत आसात; कारण अशा किरकोळ कारणांनी जर घटस्फोट जावंक लागले, तर लग्न संस्थाच धोक्यांत येतली. हाचे भायर घोव मारता, अनैसर्गिक संबंदांची मागणी करता, बायल उरफाटी उलयता, घोव म्हूण मान दिना, अशा कारणांनी लेगीत घटस्फोटाची मागणी जाता. अशीं आनी हाचे परसय कितली तरी वेगवेगळीं कारणां घटस्फोटा खातीर दितात; अर्थात, सगळ्या कारणांचो अभ्यास करूनच न्यायालय घटस्फोटाचो निकाल दिता. पूण अशा किरकोळ कारणां खातीर घटस्फोटाची मागणी करप कितपत योग्य आसा, हाचो विचार दोगांनीय करपाक जाय.
नातें खंयचेंय आसूं, तातूंत तिडकप- रुसप, फुगार जावप आसताच. संवसार म्हणल्यार आयदनाक आयदन लागताच. जर दोगांत वाद जालो, तर एकल्यान शांत रावपाक जाय. थोड्या वेळान तिडक शांत जाता आनी वादूय मिटता. पूण उतराक उतर दिलें काय वाद वाडटा आनी वादाचें रूपांतर व्हड झुजांत जाता. तातूंत दोनूय वटेनच्या नात्यांनी कोणी ना कोणी तेल ओतपी आसतातूच. अशे तेल ओतपी मनीस मदीं आयले काय हो वाद थेट न्यायालयांत पावता. सामकें क्षुल्लक कारणूय नातें तोडपाक पुरो जाता. देखून नात्याचो गोफ विणटना थोडें सांबाळूनच वागचें पडटा. ‘म्हजें चुकलें’ हें मनान मान्य करचें पडटा, तरच नातें टिकता आनी तातूंत गोडसाय उरता.
नात्यांत सगळ्यान महत्त्वाचो आसता तो विश्वास. जर ताकाच वेर गेली, तर नात्यांत वितुष्ट येताच. देखून घोव -बायला मदीं विस्वास खूब म्हत्त्वाचो. विस्वासाक तडो वचूंक ना दिवपाची जापसालदारी दोगांचीय आसा. नात्यांत दुरावो, कोडसाण येवपाचें आनी एक सामकें म्हत्त्वाचें कारण म्हणल्यार घोव- बायले मदीं आशिल्लो अहंकार. अहंकाराक लागून नातीं तुट्टात; देखून दोगांनीय अहंकार पयस दवरपाक जाय. इगो पयस दवरून परस्परां वयलो विस्वास कायम दवरलो, जाल्यार नात्यांत दुरावो निर्माण जावचो ना आनी घटस्फोटाचें प्रमाणय उणें जातलें.
– श्याम ठाणेदार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
