ग्रामीण कलाकारांनीच शिगमो तिगयला

काणकोण शिगमो उत्सवांत मार्गदर्शन करतना समाज कल्याण मंत्री सुभाष फळदेसाय. कुशीक हेर मानेस्त.

भांगरभूंय | प्रतिनिधी

सुभाष फळदेसायः काणकोणां सरकारी शिगमो उत्सवाची सांगता

भांगरभूंय । प्रतिनिधी

काणकोणः गांवगिऱ्या वाठारांतूच खरी संस्कृती आनी कला आसा. ग्रामीण वाठारांतल्या कलाकारांनीच शिगम्याची संस्कृती आनी कला तिगोवन दवरल्या, अशें समाज कल्याण मंत्री सुभाष फळदेसाय हांणी सांगलें. ते गोंय पर्यटन खातें, काणकोण नगरपालिका आनी काणकोण शिगमो उत्सव समितीन घडोवन हाडिल्ल्या सरकारी पांवड्या वयल्या शिगमो उत्सवाच्या समारोप सुवाळ्यांत मुखेल सोयरे म्हूण उलयताले. हे कार्यावळीक शिगमो उत्सव आयोजन समितीचे अध्यक्ष तशेंच सभापती रमेश तवडकार हांकां दिल्ली वचचें पडिल्ल्यान ते हाजीर रावपाक शकले नात.

ह्या वेळार माचयेर येवकार अध्यक्ष नगराध्यक्ष रमाकांत नायक गांवकार, कार्याध्यक्ष बबेश बोरकार, सचीव सर्वानंद भगत, भांडारी नगरसेविका सारा देसाय, उपनगराध्यक्ष लक्ष्मण पागी, मंडळ अध्यक्ष विशाल देसाय, नगरसेवक सायमन रिबेलो, नितू देसाय, गंधेश मडगांवकार, नादीन फर्नांडीस, सरपंच आनंदु देसाय, सविता तवडकार, सेजल गांवकार, प्रतिजा बांदेकार, फातिमा रॉड्रिग्ज, जिल्हो पंयात वांगडी शाणू वेळीप, शोभना वेळीप, पर्यटन खात्याचे अधिकारी, विवीध पंचायतींचे पंच आनी हेर मानेस्त हाजीर आशिल्ले. फळदेसाय हांचे हस्तुकीं विवीध मळा वयल्या मानेस्तांचो शाल, नाल्ल, मानपत्र आनी यादस्तीक चिन्न दिवन सत्कार केलो.

मंत्री फळदेसाय हांणी सांगलें, चल्या- चलयांनी ग्रामीण वाठारांत नवे पंगड घडोवन शिगमो उत्सवांत वांटो घेतलो ही कवतुकाची गजाल. ह्या वेळार तांणी पैंगीणच्या कला पंगडाक परबीं दिवन तांकां आपणें खाशेलें इमान जाहीर केलें.

ह्या वेळार शाण बोबो वेळीप, साळू रामा गांवकार, मोलू नायक गांवकार, मायावती गांवकार, सुधाकर धर्मू पागी, केशव पागी, विंदा सतरकार, विटू कोमरपंत, बाबू पांगळो वेळीप, दिलीप केंकरे, रमाकांत बांदेकार, व्यंकटराय नायक, प्रशांत देसाय, दामोदर च्यारी, सुभाष महाले, अनील फळदेसया, सुभाश कोमरपंत, सायमन रिबेलो, पद्मा भट, रामदास फळदेसाय, सावियो सिप्रियानो फर्नांडीस, दिलशुश खोलकार, इंदुमती म्हाळशी, मंगेश पागी, मोजेस कार्दोज, दिलीप देसाय हांचो सत्कार केलो.

तशेंच समाजांत एकचार निर्माण करपाचो वावर करपी माटवेमळ, साळेरी, आगोंद, पाळोळे, चाररस्तो चावडी, राजबाग, पुलीस स्टेशन, वडामळ, गांवडोंगरी, खोतीगांव, पैंगीण, लोलयें भौशीक गणेश उत्सव मंडळाच्या प्रतिनिधींचो ह्या वेळार सत्कार केलो. तशेंच तीन गटांनी जाल्ले भोवढंगी भेस सर्तींतल्या जैतिवंतांक इनामां भेटयलीं. रमाकांत नायक गांवकार, बबेश बोरकार, सविता तवडकार, अजीत पैंगीणकार, सायमन रिबेलो हांणी ह्या वेळार विचार मांडले. सुत्रसंचालन शिरीष पै हांणी केलें. कार्यावळ येसस्वी करचे खातीर सनिजा देसाय, अरुणा शेट देसाय, दिलखुश शेट, प्रशांत देसाय, संजय कोमरपंत, मनोज नायक गांवकार, अनील फळदेसाय, धीरज काणकोणकार आनी दिलीप देसाय हांणी कश्ट घेतले.

उत्सवाक खत, मारपेटांत दुचाकी चालक गंभीर

काणकोणच्या शिगमो उत्सवाक अंदूंय खत लागलें. पांच वर्सां आदींय काणकोणच्या शिगमो उत्सवांत दोन गटां मदीं मारामारी जाल्ली. जाल्यार कांय वर्सां आदीं इनाम मेळूंक नाशिल्ल्याच्या कारणा वयल्यान आयोजक आनी शिगमो उत्सव पंगडा मदीं वाद जाल्लो. कोरोना म्हामारी काळांत शिगमो उत्सव जावंक नाशिल्लो. मात 2023 च्या सरकारी पांवड्या वयल्या शिगमो उत्सवांत काणकोणचो एक दुचाकी चालक अशोक नायक (शेळेर काणकोण) हाचे दुचाकीचो शिगमो उत्सवांत वांटेकार जाल्ल्या एका पंगडांतले गाडयेक धपको बसलो. ताका लागून तांचो वाद जालो आनी उपरांत ताचें रुपांतर मारामारींत जालें. ह्या झगड्यांत शिगमो उत्सवांत वांटेकार जाल्ल्या पंगडांतल्या वांगड्यांनी अशोक नायक हांकां खुबूच मारपेट केलो, ताका लागून तो गंभीर जखमी जालो. ताचेर मडगांवच्या जिल्हो हॉस्पिटलांत उपचार चालू आसात. काणकोण शिगमो उत्सव आयोजन समितीचे कार्याध्यक्ष बबेश बोरकार हांणी केल्ले कागाळे वयल्यान काणकोण पुलिसांनी एफआयआप नोंद केल्या. पुलीस निरिक्षक चंद्रकांत गांवस फुडलो तपास करतात. हे मारामारीचे परिणाम काणकोण तेचवरी कारवार (अशोक नायक हांचो मूळ गांव) मेरेन पावल्यात. काणकोण पुलिसांनी खोलायेन चवकशी करून गुन्यांवकारांचेर कारवाय करची, अशी मागणी नेट धरपाक लागल्या. हें प्रकरण चेंपून दवरचे खातीर राजकी पांवड्याचेर हालचाली सुरू आशिल्ल्याची म्हायती मेळ्ळ्या.

लोक न्हिदले उपरांत पंगड दाखल

गोंयाक कलाकारांची खण म्हणटात. गोंयांतले रसीक लेगीत कलाकारांची कदर करता. मात हालींच्या काळांत कांय कला पंगड पयसो होच व्हड अशें मानपाक लागल्यात काय कितें, असो प्रस्न पडपा सारके वागपाक लागल्यात. हाचो प्रत्यय काणकोणच्या सरकारी शिगमो उत्सवांत दितलो.

पर्यटन खात्यान शिगमो उत्सव आयोजन समितीक परतून परतून सुचोवणी दिवन उत्सव रातच्या 10 वरां मेरेन सोंपोवचो अशें सांगिल्लें. ते प्रमाण आयोजन समितीन शिगमो उत्सवांतल्या सगळ्या पंगडांक वेळाचें बंधन घालून दिल्लें. काणकोण शिगमो इत्सवांत वांटो घेवपा खातीर आयिल्ले रोमटामेळ पंगड आदीं नोंदणी करून लेगीत शिगमो उत्सव मिरवणुकेंत रातच्या 10.30 वरां उपरांत वांटेकार जालीं. ताका लागून रसिकांक रोमटामेळाचो आस्वाद घेवपाक मेळूंक ना.

आयोजकांनी थारायिल्ले प्रमाण चाररस्तो ते गायतोंडे मैदाना मेरेन रोमटामेळाची मिरवणूक आशिल्ली. मात कांय पंगड नव्या कदंब बस स्टॅण्डा मेरेनूच आयले जाल्यार कांय पंगडांनी आपली कला सादर करिनासतनाच चलत कदंबा स्टॅण्डा मेरेन पावले. रोमटामेळांची वाट पळत राविल्ले लोक अखेर बेजारून घरा गेले. रोमटामेळ पंगड वेळाचें बंधन पाळीनात, आयोजकांची घालून दिल्ले नेम पाळीनात, मनमानी कारभार चलयतात. लोकां खातीर शिगमो उत्सवाचें आयोजन करतात, हाचें भान रोमटामेळ पंगडांनी दवरपाक जाय आशिल्लें, अश्यो प्रतिक्रिया लोकांनी उक्तायल्यो.