भांगरभूंय | प्रतिनिधी
भांगरभूंय । खबरां मेज
पणजी) गोंयांतल्या मराठी पत्रकारांक परत माची मेळोवन दिवपा खातीर गोवा मराठी पत्रकार संघाचें काम नव्यान सुरू करपाचो निर्णय मराठी पत्रकारांचे फाटल्या शेनवारा जाल्ले बसकेंत घेतलो. फाटल्या कांय वर्सां सावन निश्क्रिय जाल्ल्या संघाचो वावर परत सुरू करपाची गरज बसकेंत सध्याच्या आनी आदल्या मराठी पत्रकारांनी उक्तायली.
गोवा मराठी पत्रकार संघाचो आदलो अध्यक्ष आनी ज्येश्ठ पत्रकार र वी प्रभुगांवकार हे ह्या बसकेचे निमंत्रक आशिल्ले. तांचेय येजमानके खाली ही बसका जाली. गुरूनाथ नायक हाच्या अध्यक्षते खाला मराठी पत्रकार संघाचे काम फाटल्या तीन दशकां सावंन बंद पडिल्ल्यान ताची परत बांदणी करपा वांगडा हेर कांय प्रस्तावांचेर बसकेंत चर्चा जाली. काणकोण पसून पेडणे मेरेनच्या कांय ज्येश्ठ पत्रकारांनी बसकेक हाजीर रावन संघाचें काम मार्गार हाडपाची गरज आसा अशें सांगलें. ज्येश्ठ पत्रकार आनी बसकेचो सहनिमंत्रक वामन प्रभू हाणे बसका घेवपा फाटलो हेत सांगलो आनी संघाचें काम फुडें कशें व्हरपाक जाता ताचेर कांय सूचोवण्यो केल्यो. अजित पैंगीणकार, गंगाराम म्हांबरे, विठ्ठल पारवाडकार, प्रकाश तळवणेकार हांणी चर्चेंत वांटो घेवन सूचोवण्यो केल्यो.
दोन वरां चलिल्ले हे बसकेंत जयंत संभाजी, रमेश कोलवाळकार, गुरुदास सावळ, सुरेश नायक हांणी संघाच्या फुडारा विशीं आपलीं मतां मांडली. संघाच्या घटनेतल्या तजविजां प्रमाण फुडलें पावल घालपाचे बसकेंत थारलें. फुडलें काम करपा खातीर जयंत संभाजी हाच्या अध्यक्षते खाला पांच वांगड्यांची एक अस्थायी समिती वेंचून काडली. तातूंत गुरुदास सावळ, वामन प्रभू, रमेश कोलवाळकार आनी सुभाष कृ नायक हांचो आसपाव आसा
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
