भांगरभूंय | प्रतिनिधी
अमित पाटकार, युरी आलेमांव हांचें नव्या पक्षाविशीं मौन
पणजी : राज्यात गोवा कॉंग्रेस पक्ष स्थापन जावपाच्या हालचालींक लागून राजकी मळार खवदळ निर्माण जाला. गोवा फॉरवर्डाचे विजय सरदेसाय हांचे सयत कांय जाणांनी प्रतिक्रीया उक्तायल्या आसल्यो तरी आदले प्रदेश अध्यक्ष अमीत पाटकार, कॉंग्रेस विधीमंडळ फुडारी युरी आलेमांव हांणी जाहीरपणान प्रतिक्रीया दिवंक ना. भाजपान लेगीत गिरीशाच्या आरोप जाप दिवंक ना.
कॉंग्रेसीचे राष्ट्रीय सरचिटणीस के. सी. वेणुगोपाल हांच्या फुडारपणा खाला फाल्यां जावपी बसका वादळी थारतली. हातूंत गोवा कॉंग्रेस पक्षाच्या विशयाचेर चर्चा अपेक्षीत आसा.
धर्मनिरपेक्ष मतांचें विभाजन जावपा खातीर एक नवो पक्ष स्थापन करपाचो भाजपाचो डाव आसा. हाचे खातीर १०० कोटींची तजवीज केल्ल्याचो आरोप प्रदेश कॉंग्रेस अध्यक्ष गिरीश चोडणकार हांणी फाटले सप्तकात केल्लो. गिरीश चोडणकार हांची बौद्धीक तपासणी जावपाक जाय, अशी जाप भाजपाचे आदले आमदार सिद्धार्थ कुंकळ्येंेकार हांणी दिल्ली. हाचे उपरांत भाजपाचे म्हणयारे सिद्धेश नायक हांणी लेगीत ह्या आरोपाचे खंडण केल्लें. हे आरोप प्रत्यारोप जाले उपरांत गोवा कॉंग्रेस पक्ष ह्या नव्या पक्षाविशीं हरकती आपोवपी नोटीस जारी जाल्या. ही नोटीस आनी प्रदेश कॉंग्रेस अध्यक्ष गिरीश चोडणकार हांच्या आरोपाक भाजपाक जाप दिवंक ना.
राज्यांतली कायदो सुवेवस्था इबाडिल्ल्याची कागाळ कॉंग्रेसीन राज्यपालांकडेन केल्ली. फिक्स युवर्स फर्स्ट, ऑर्डर इज कॉलेप्सींग विदीन, अशी प्रतिक्रीया आदले खासदार ऍड. नरेंद्र सावयकार हांणी उक्तायल्या. मुख्यमंत्री डॉ. प्रमोद सावंत वा प्रदेश भाजप अध्यक्ष दामू नायक हांचे कडेन संपर्क सादलो तेन्ना तांणी प्रतिसाद दिवंक ना.
गोवा प्रदेश कॉंग्रेस पक्षाचो अध्यक्ष म्हणून ज्या मनशाक हाडला, ताका लागून कॉंग्रेसीचे लोक बेजार जाल्यात. ह्या बेजारसावणेंतल्यान हो पक्ष स्थापन जाता. ज्या मनशाक कसलोच मान ना ताका घेवन वेंचणुकेक वचप शक्य जावचें ना, अशें फुडार्यांक सांगलें. तरी वडील फुडार्यांनी हें आयकूंक नाशिल्ल्यान आतां नवो पक्ष स्थापन जाता, अशें नव्या पक्षाविशीं उलयतना फादर एरमितो रिबेलो हांणी म्हणलां. मात हाचे फाटल्यान भाजपाचो हात आशिल्ल्याचो दुबाव तांणी न्हयकारला.
आपलो अदमास खरो थारलो, अशें प्रदेश कॉंग्रेस अध्यक्ष गिरीश चोडणकार हांणी म्हणलां.
कॉंग्रेसीन आपलें घर जाग्यार घालचें : विजय सरदेसाय
पक्ष स्थापन करपाचो अधिकारी सगळ्यांक आसा. तरी कॉंग्रेसीच्या नांवान हो पक्ष स्थापन जायत आशिल्ल्यान कॉंग्रेसीन लक्ष घालपाची गरज आसा. गोवा फॉरवर्डाची कॉंग्रेसीकडेन युती आसा. कॉंग्रेसीन आपले घर जाग्यार घालचें, अशें गोवा फॉरवर्डाचे अध्यक्ष विजय सरदेसाय हांणी म्हणलां.
नव्या पक्षाविशीं सगळेच दुबावीत : श्रीनिवास खलप
नवो पक्ष स्थापन करपा खातीर मतदार वळेरींत नांवां आशिल्ले उण्यात उणे १०० वांगड्यांची गरज आसता. हातूंत अध्यक्ष, सरचिटणीस, भांडारी आनी कार्यकारिणी समितीचो आस्पाव आसपाक जाय. कॉंग्रेसीच्या नांवान नव्या पक्षाच्या नोंदणीची प्रक्रीया सुरू जाता, वेंचणूक आयोग हरकतीं खातीर नोटीस जारी करता, हें अजाप आसा. सगळ्यांविशीं दुबावाची स्थिती आसा, अशें कॉंग्रेसीचे पदाधिकारी ऍड. श्रीनिवास खलप हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
