भांगरभूंय | प्रतिनिधी
पणजीः गोवंश हत्या बंदी कायदो पुराय देशभरांत चालीक लावपा खातीर 27 एप्रीलाक स्वाक्षरी मोहीम घडोवन हाडटले. ते प्रमाण राज्यांतल्या दरेका तालुक्याच्या संबंदीत उपजिल्होधिकाऱ्यांक निवेदन दितले. तशेंच निवेदन मुख्यमंत्री, राज्यपाल, प्रधानमंत्री आनी राष्ट्रपती हांकांय दितले अशी म्हायती हनुमंत परब हांणी दिली. बुधवारा पणजेंत जाल्ले पत्रकार परिशदेंत ते उलयताले. ह्या वेळार कुलदीप गोपाल, गजेंद्र राजपुरोहित आनी हेर हाजीर आशिल्ले.
परब हांणी सांगलें, 27 एप्रीलाक गोंयां सयत देशभर ही मोहीम चालीक लायतले. ही मोहीम घडोवन हाडपा खातीर वेगवेगळीं गो मोगी संघटना एकठांय आयल्यात. हातूंत खंयचोच राजकी पक्ष वा संघटनेचो हात ना. हे आंदोलन न्हय तर फकत स्वाक्षरी मोहीम आसा. देशभरांतल्या गोरवांची लोकसंख्या सुरक्षीत दवरपा खातीर गोवंश हत्या बंदी कायदो हाडप गरजेचें आसा. हाचे भायर गोरवाक राश्ट्रीय दर्जो दिवचो अशीय मागणी ह्या निवेदना वरवीं करतले.
गोरवांचे सेवे खातीरय कायदेशीर तरतूद करपाक जाय. गोरवांचे सेवे खातीर खाशेलें मंत्रालय तयार करप, म्हामंडळ स्थापन करप, गोरवांक चारो उपलब्ध जातलो हाची खात्री करप अश्यो मागणी आमी करतले. पयल्या टप्प्यांत देशभरांतल्यान 11 कोटी स्वाक्षरी एकठांय करप हो आमचो हेत आसा. ते उपरांत 27 जुलय, 27 ऑक्टोबर आनी 27 फेब्रुवारी 2027 मेरेन अशी मोहीम चालू उरतली अशेंय परब हांणी सांगलें.
आमी फाटलीं जायतीं वर्सां गो हत्या बंदी खातीर यत्न करतात. स्वाक्षरी मोहीम हो ताचोच एक भाग. गोंयच्या गो मोगींनी तेंको दिवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
