भांगरभूंय | प्रतिनिधी
पणजे गाडयेच्या धपक्यान गोरूं जखमी
पणजी : गोंय सरकार गोरवां पोसपा खातीर समाजीक येवजण्यां खाला दर दिसा थारिल्ली रक्कम अनुदान म्हणून दिता. मात कांय जाण येवजणेंतल्यान मेळपी पयशे घेतात आनी गोरवांक मात मेकळे सोडटात. मागीर तीं गांवभर भोंवतात. तांची येरादारीक आडखळ निर्माण जाता. तांकां लागून अपघातूय घडटात. लोकांच्या पोरसांनी, शेतांनी वचून तीं भाजीपालो, भात, तण खातात.
मजगतीं, सांतिनेज- पणजे मधुबन सर्कला लागसारा काल एक घडणूक घडली. हांगा एके चारचाकी गाडयेन धपको दिल्ल्यान पाडूक जखमी जालें. पांय दुखवल्ल्यान ताका चलपाकूय जायनाशिल्लें. मात हो अपघात जावन लेगीत पाडकाचो धनी येवंक ना. उपरांत थळाव्यांनी तिचे वांगडा आशिल्ले गायेच्या कानांतल्या टॅगा वरवीं धनयाक सोदपाचो यत्न केलो. मेळिल्ले म्हायती प्रमाण, ही गाय सिंधुदुर्गाची आनी तिचो धनी गोंयांतूच एका फ्लॅटांत रावता. हे विशीं एके गोशाळेक म्हायती दिल्या.
मजगतीं, पशुसंवर्धन खात्या वतीन फाटीं गोमंतक गोसंवर्धन येवजण अधिसूचित केल्या. ते प्रमाण एका कुटुंबाक चडांत चड ५ देशी गोरवां पोसपाक मजत करतले. ते प्रमाण दरेका गोरवा फाटल्यान दिसाक ८० रुपया अर्थीक मजत दितले.
गोंयांत सगळेच कडेन हेडगीं गोरवां भोंवतना दिसतात. ताका लागून येरादारीक आडखळ निर्माण जाता. हेडग्या गोरवांक लागून अपघात जावन मरण आयिल्ल्याच्यो घडणुकोय घडल्यात. हाचेर उपाय म्हणून सरकारान आतां रस्त्यावेली हेडगीं गोरवां, जनावरां जप्त करपाचो निर्णय घेतला. हे विशीं पशुसंवर्धन खात्याचे संचालक डॉ. नितीन नायक हांणी हालींच आदेशूय काडिल्लो. ते प्रमाण, कामधेनु वा पशुपालन येवजणे खाला घेतिल्लीं गोरवां भौशीक सुवातांचेर वाा रस्त्यार हेडटना सांपडल्यार लाभार्थ्यांक दिवपी सगळें अनुदान सरकार वसूल करून घेतलें. असल्या मनशांक फुडाराक खात्याच्या कसलेच तरेच्या येवजण्यांचो लाव घेवपाक मेळचो ना. तांकां सरकार काळे वळेरेंत घालतलें. ह्यो दोन सोडून खात्याच्यो हेर येवजण्यो घेतिल्ल्यांकूय होच नेम लागू जातलो. आतां जखमी जाल्ल्या ह्या पाडकाच्या धनयाचेर सरकार आनी संबंदीत खातें कितें कारवाय करता हें पळोवप उमळशीकेचें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
