भांगरभूंय | प्रतिनिधी
गोरवांच्या उपचारा खातीर जाय मोबायल एम्बुलन्स
पणजी: गोरवांचें खाण म्हारग जाल्ल्यान दुदाचो वेवसाय परवडना. सवाय दरांत गोरवांचें खण उपलब्ध करून दिवपाची मागणी आमदारांनी केली. नुस्तेमारांक डिझेलाचे अनुदान वेळेंत मेळपा सयत गोरवांच्या उपचारा खातीर मोबायल एम्बुलन्स व्हॅन सुरू करपाची मागणी आमदारांनी केली.
सभाघरांत शुक्रारा नुस्तेमारी, गोरवां पोसपी, कारखानो आनी बाश्पक खात्याच्या मागण्यांचेर चर्चा जाली. हे चर्चेत आमदारांनी समस्या मांडपा सयत तरेकवार सुचोवण्यो केल्यो.
राज्यात दिसाक 4 लाख लिटर दुदाची गरज आसा. हाचे पैकीं 1 लाख 75 हजार लिटर दूद राज्यांत तयार जाता. 2 लाख 25 हजार लिटर दूद भायल्यान हाडचें पडटा. गोरवां घेवन दुदाचो धंदो करप परवडना, अशें आमदार डॉ. चंद्रकांत शेट्ये हांणी सांगलें. सरकार दर वर्सा अनुदानाचेर 30 कोटी रुपया खर्च करता. हें अनुदान वेळेंत मेळना. वेळेंत पयशे मेळनाशिल्ल्यान नवें भुरगे दुदाच्या धंद्यांत येवपाक पळयनात. अनुदान दिवपाची प्रक्रिया सुटसुटीत केली ना, जाल्यार दुदाचो वेवसाय करपी लोकांचो आंकडो आनीक उणो जातलो, असो हुस्को डॉ. चंद्रकांत शेट्ये हांणी उक्तायलो. गोंयकारांक सवाय दरांत नुस्तें मेळपा खातीर नुस्तें म्हामंडळ स्थापन करपाची मागणी डॉ. चंद्रकांत शेट्ये हांणी केली.
बायणा तशेंच हेर वाठारांनी जे परंपरीक नुस्तेकार रावतात तांची घरां नेमीत करपाची मागणी आमदार संकल्प आमोणकार हांणी केली. परंपरीक नुस्तेमारांचीं घरां अजून मेरेन नेमीत जावंक ना. तशेंच नुस्त्याचो वेवसाय करपी नुस्तेमारांक व्हडीं तशेंच जाळां खातीर विम्याचें संरक्षण मेळना. तांकां विम्याचो लाव दिवपाची मागणी संकल्प आमोणकार हांणी केली.
गोरवांक चरपा खातीरचे जे परंपरीक मळ आशिल्लें तांची जतनाय करपाची मागणी आमदार उल्हास तुयेंकार हांणी केली. चरपाचे मळ उणे जाल्ल्यान गोरवां रस्त्याचेर येवपाचें प्रमाण वाडलां, अशें उल्हास तुयेंकार हांणी सांगलें.
गोरवांच्या खाणा खातीर चड पयशें खर्च करचे पडटात. पेंडी सयत गोरवांचें खाण तयार करपी कारखानो राज्यांत सुरू जावपाक जाय. कारखानो सुरू जालो जाल्यार सवाय दरांत शेतकारांक गोरवांचें खण मेळप शक्य जातलें अशें आमदार प्रेमेंद शेट हांणी म्हणलें.
धाट आनी कालें हांगा गोरवांचो चारो तयार करपी फार्म आसा. ह्या फार्मांनी सुदारणा जावंक जाय. चाऱ्याचे (फॉडर) उत्पादन वाडलें जाल्यार शेतकारांक व्हड प्रमाणांत लाव जातलो, अशें आमदार गणेश गांवकार हांणी सांगलें.
सत्तरीच्या धनगरांक जमनीचे मालकी हक्क नाशिल्ल्या कारणान कामधेनू येवजणेचो लाव मेळना. धनगरांक कामधेनू येवजणेचो लाव मेळचो म्हूण कामधेनू येवजणेंत दुरुस्ती करपाची मागणी आमदार देविया राणे हांणी केली.
नुस्तेमारांक डिझेलाचेर मेळपी अनुदान येवजण आतां बंद जाल्या. ती परतून सुरू करपाची मागणी आमदार केदार नायक हांणी केली.
कार्लोस फेरेरा हांणी गोरवांचेर उपचार करपा खातीर मोबायल वैजकी एम्बुलन्स सुरू करपाची मागणी केली. अपघाताक लागून खूबशीं गोरवां रस्त्यार जखमी जातात. हांचे खातीर एम्बुलन्स सुरू करपा सयत पुनर्वसन केंद्र सुरू करपाची गरज फेरेरा हांणी उक्तायली.
आमदार प्रवीण आर्लेकार हांणी पशुवैजकी म्हाविद्यालय पेडणें मतदारसंघात धारगळे सुरू करपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
