भांगरभूंय | प्रतिनिधी
दिवचल, प्रतिनिधी ः आयज गोरवां पाडवो. ह्या निमतान मुख्यमंत्री डॉ. प्रमोद सावंत हांणी गो शाळेक भेट दिवन गायेची पुजा केली. गायेची सेवा म्हळ्यार देवाची सेवा आनी तातूंतल्यान मेळपी आनंद आगळोवेगळो आसता अशें तांणी सांगलें.
लोकांनी आपल्या गायांक रस्त्यार सोडनासतना तांची योग्य जतनाय घेवपाची गरज आसा आनी हे खातीर सरकार चार गायां खातीर दिसाक 150 ते 600 रुपया अनुदान दिता. ताचो फायदो घेवन गायी मोगींनी गायांची सोवा करची. सरकार सगल्या तरेची मजत दिवपाक तयार आसा अशें मुख्यमंत्री डॉ. प्रमोद सावंत हांणी स्पश्ट केलें.
पाडव्याच्या निमतान गो- शाळेंत मुख्यमंत्र्यान गायांची पुजा करून गायांची जतनाय घेवपाची बरी बुद्धी गोंयकारांक मेळची अशी प्रार्थना केली. ह्या वेळार अध्यक्ष वल्लभ साळकार, सुभाष मळीक आनी हेर हाजीर आशिल्ले.
हेडगी गोरवां ही एक व्हडली समस्या निर्माण जाला आनी सरकार वेगवेगळ्यो उपाय येवजण करुन हाचेर मात करपाचो यत्न करीत आसा. पूण जांचे कडेन गोधन आसात तांणी गोरवां रस्त्यार सोडची न्हय हाची जतनाय घेवची. हाचे खातीर सरकारान दरेक घरांत चार गायां खातीर दिसाक 150 ते 600 रुपया अनुदान दिवपाचे निश्चित केला. हाचो फायदो सगल्यांनी घेवचो.
हेडग्या गोरवांक लागून रस्त्यार जावपी अपघातांचो आंकडो वाडत आसा आनी ताचेर नियंत्रण दवरपा खातीर सरकार सगळे यत्न करता अशें मुख्यमंत्री डॉ. सावंत हांणी ह्या वेळार सांगलें. ह्या वेळार तांणी गायेची पुजा करून आशीर्वाद घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
