भांगरभूंय | प्रतिनिधी
नवी दिल्लीः निमाणें केंद्रीय वेंचणूक आयुक्त अरुण गोयलाच्या राजिनाम्या विशीं स्पश्टीकरण दिवन केंद्रीय वेंचणूक आयुक्त राजीव कुमार हांणी दुबाव पयस करपाचो यत्न केलो. अरुण गोयल हांणी वैयक्तीक कारणांक लागून राजिनामो दिलो अशें सांगून मुखेल वेंचणूक आयुक्त राजीव कुमार हांणी फुडलें सांगपाक न्हयकार दिलो.
आयोगान अस्तंत बंगालांतली भोंवडी पुराय केल्या उपरांत ८ मार्चाक अरुण गोयल हांणी राजिनामो दिलो. राजीव कुमारा कडेन मतभेद आशिल्ल्यान अरुण गोयल हांणी राजिनामो दिल्ल्याची चर्चा चालू आशिल्ली. कुमार हांणी हें विशीं उलोवपाक टाळ्ळें आनी ताचे बदला गोयल हांच्या कामाचे नीतीची तोखणाय केली. गोयल हो सामके मानाचे वांगडी आशिल्ले. ताचे वांगडा काम करपाक सदांच खोस जाताली अशें राजीव कुमार हांणी सांगलें.
खंयचेय संस्थेंत दरेका वांगड्याक वैयक्तीक स्वातंत्र्य दिवचें, ताका कोणेंच हरकत घेवची न्हय. गोयला कडेन राजिनामो दिवपाचीं वैयक्तीक कारणां आशिल्लीं. तुमी (मिडिया) तांकां हे विशीं विचारपाक जाय अशें राजीव कुमार हांणी सांगलें. तशेंच भलायकेच्या कारणांक लागून गोयल हांणी राजिनामो दिवपाचीं कारणांय तांणी न्हयकारलीं. केंद्रीय वेंचणूक आयोग मुक्तपणान काम करता अशें राजीव कुमार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
