भांगरभूंय | प्रतिनिधी
आमचे हे भांगरभुंयेचो, गोंय राज्याचो वर्सदीस सदचे वरी 30 मेक अंदूंय मनयतात. अंदूंच्या राज्योत्सव दिसाचें खाशेलपण म्हणल्यार तो मंगळारा आयला. “पवित्र हो मंगळार, आयचो पवित्र हो मंगळार” हें गीत म्हणत तो मनोवया. ‘तेंपा प्रमाण कुरपणें’ हे ओपारी प्रमाण शिंवाचो धेक ह्याच म्हुर्तार बदलतलो काय शींव परतून एकदां व्हड आवाज करतलो? तें होल्मतलें व्हय? राजकारण तें खंयच्याच एका पक्षाचें सरकार वर्सांचीं वर्सां कशें तिगतलें? उदरगती खातीर सरकाराची थिराय म्हत्वाची. अंदूंच्या राज्योत्सवा दिसा गोंयांक राजकी थिराय दिवप्यांक समेस्तांनी मळबा कडेन पळयत नमस्कार करून ‘यो रे पावसा’ म्हणुया. गोंय राज्य पिरायेचे 40 कडेन वतना परतून एकदां शाळेंत ‘शाळा सुटली पाटी फुटली,’ ‘आई मला भूक लागली,’ ‘भारत आमचो म्हान रे’ हीं गितां आयकूंक मेळटलीं. वांगडा ‘हडवो ताल्ल बेबो’ डरांव डरांव करून आयल्यार ताका मारूंक नाका असो उलो तुमी आमी मारतलेच, तेच बराबर माय म्हादय वाटावपाचो सोपूत सरकार घेतलें अशी आस्त बाळगुया.
‘विखुरिल्ल्या पत्रपानां’नी हे भांगरभुंयेक राज्य पांवडो कसो, केन्ना मेळ्ळो ती काणी आयकूंक मेळटलीच. मांडवी ते गालजीबाग मेरेनच्या न्हंयांच्या नितळसाणी पासत होरावणी घालपी कमलाकर साधले, सरबराय शिक्षणाक नवी दिका दिवपी अंजू अवधूत तिंबलो हांकां गोमंत विभुशण मेळत? पद्मश्री प्रसाद सावकार, विनायक खेडेकार, प्रभाकर कारेकार पावसा वतान चलत पासये वयल्यान भोंवपी, बाजार करपी. तांची वळख भांगरभुंयेंतल्या भुरग्यांक जातलीच, हाची सरकारान जतनाय घेवची.
10 वी, 12 वी पास जाल्ल्या सगल्या विद्यार्थ्यांक उंचेल्या शिक्षणाची बेगोबेग वाट दाखोवपी पयले गोंयकार शिक्षण सचीव प्रसाद लोलयेंकार मेकळेपणान वावराक लागल्यात. तांचे गुरू प्रा. भास्कर नायक, देशाक सेवा दिवपी गोंय लोकसेवा आयोगाचे आदले अध्यक्ष अरविंद भाटीकार हेय गोमंतभूशणच. उतरांच्या बाणांनी भांगरभुंयेंतल्यान सरकाराक मायभाशेंतल्यान शिकोवपाचो आरंभ करुया हें सांगपी प्रा. नारायण देसाय आजय सरफरोशी की तमन्ना म्हणटात? आंगोलाक राजदूत म्हणून वचपी गोंयकार आय ए एस अधिकारी पद्मश्री वामनबाब सरदेसाय हांचे वरी तांची घरकान्न लिबियाबाय सरदेसाय हांकांय सलाम करपाचो होच वेळ. ‘कावळ्याचो भोपशाचेर दोळो’ हे ओपारी प्रमाण राज्यसभा, लोकसभा वेंचणूक उमेदवारी मेळोवपाची इत्सा आशिल्ले हजार आसतले, गरज आसा शिक्षण, पिराय, भलायके वांगडा पक्षनिश्ठा तपासपाची.
राजकारणांत दावे उजवे आसताच, पत्रकारितेंत चडशे उजवे. सदांच नकारात्मक नदरेन पळोवपीय नासतले अशें न्हय, देव तांकां बरी बुद्ध दिवं, वेवसायीकतेक वेंग मारतल्यांक मनीसपण जागोवपाची तांक मेळूं.
कशी आसा आमची भांगरभूंय? पर्यटनमंत्री रोहन खंवटे सांगत व्हय? पर्यटन कूस बदलतना फकत डेहराडून, शिमला, काश्मीर न्हय, बद्रिनाथाक व्हरपा खातीर कोंकण रेल्वे मार्गा वयल्यान खासा रेलगाडी येत व्हय? गोंयां येवपी देशी भोंवडेकारांक (भोंवडी- वाघा, शिंवांची शिकारेक न्हय) हिन्दी, कोंकणींतल्यान गोंयचें व्हर्च्युअल दर्शन घडोवपाची वेवस्था जायत व्हय? गोंयच्या देवळांक व्हड सासाय, दायज आसा, त्या दायजाच्यो कुरवो पोरन्या सचिवालयांत (आदल्या आदिलशहाच्या राजवाड्यांत) आसात. गोंय राज्यदिसा निमतान मुखेलमंत्री डॉ. प्रमोद सावंत पणजेच्या सचिवालयाची पळोवणी करतले? राज्य पावंडो गोंयांक फावो जातकीच पयले मुखेलमंत्री आशिल्ले पयलींचे आमदार प्रतापसिंह राणे हांची हालीं तांणी भेट घेतल्या? भाऊ, ताई, खाशे, भाईंचीं व्यक्तीचित्रां पुस्तकांतल्यान सोंप्या उतरांनी भुरग्यां मेरेन पावपाक जाय. मुळाव्या शाळांनी तिसरे यत्तेंत आदीं इतिहास शिकयताले ते वरींच शिक्षणावेवस्था आसची. गोवा बोर्डाचे पयलींचे अध्यक्ष पांडुरंग नाडकर्णी बोर्डाचो इतिहास सांगतना साने गुरुजींच्या ‘खरा तो एकच धर्म हवा, जगाला प्रेम अर्पावे’ ह्यो काणयो चवथेक सप्तकाक एकदां सांगतले. गोवा बोर्डाचे पयले अध्यक्ष डॉ. सुरेश आमोणकार आनी तांची घरकान्न सुधा आमोणकार हांचें नातें कवी बाकीबाब बोरकार हांचे लागीं आशिल्लें. आमोणकार हांचे पूत राज एक बरे आर्टिस्ट, कलेचें शिक्षण तांणी खंय घेतिल्लें? गोंय कला म्हाविद्यालयाचो दर्जो देशांत कितें आसा? तें सोदपाक तांचो आदार सरकारान घेवपाक जाय. वरिश्ठ पत्रकार लक्ष्मीदास बोरकार हांचें अंदूं जल्मशताब्दी वर्स, तांची याद राष्ट्रीय पत्रकारिता दिसा सरकारान करची. बाकीबाबांचें घर कशें आसा? तें पुराय मोडून वचूंक ना मू? पयले ज्ञानपीठकार रवीन्द्रबाब केळेकार हांच्यो यादी विखुरिल्ल्या पत्रपानांनी सांगतना तांच्या सपनांतलें तुळशी (तांच्या कादंबरींतले, नाटकांतले) नोबल पुरस्कारा मेरेन पावोवापची जापसालदारकी प्रा. भूषण भावे, आकाशवाणी अधिकारी मुकेश थळी घेतलेच, मजत सरकारान करची. रवीन्द्रबाबांचें चरित्र, विनोबा भावे, काकासाहेब कालेलकार हांचे कडेन आशिल्ल्या नात्या विशीं कवी माधवबाब बोरकार, उल्हासबाब रायकार हांणी सांगपाक जाय.
गोंयांत दुसरें वैजकी म्हाविद्यालय, उंचेल्या शिक्षणांत बदलाचें वारें अंदूंच्या राज्य दिसाची मोख दवरची. गोवा चेंबर ऑफ कॉमर्स अँड इंडस्ट्रीचे श्रीनिवास (बाबा) धेंपे अध्यक्षपदार आयल्यात. तरनाट्यांक उद्येग, वेवसायाची नवी दिका दाखोवपाचो तांचो हावेस पुराय करपा पासत तांकां शुभेच्छा दिवया. पर्यटकांक पर्तगाळ वाठारांतलो सैम दाखोवपाक, मठाधिशांक शिक्षणांत हाडपाक तांणी येत्न करचे. तांकां राज्यसभेर धाडल्यार?
खबरेन चडांत चड नांवां, तींय अचूक आसपाक जाय, श्री श्रीमती नासल्यार उपकारता हें मतींत दवरात, दोन वर्सां तरी एकाच मिडियांत रावात, थळावी भास शिकात, फुडारा खातीर, भुरग्यां पासत.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
