भांगरभूंय | प्रतिनिधी
कॅ. विरियातो फर्नांडीसः गोंय सांबाळपाचो निश्चेव करपाचो उलो
भांगरभूंय । प्रतिनिधी
मडगांवः डॉ. जॅक सिक्वेरा हांणी जनमत कौला वेळार गोंय वाटावपा खातीर रातदीस यत्न करून लोकांक गोंय सांबाळपा खातीर जागृत केले. त्या वेळार तांणी केल्ल्या यत्नांक येस आयलें. गोंय वेगळें राज्य उरलें. आतां गोंयकार म्हूण आमकां परतून एकदां दुसरी क्रांती करून गोंय सांबाळपाची गरज आसा. गोंयांत ड्रग्स मेळटात, गुन्यांव वाडटात. ते खातीर गोंयची अस्मिताय सांबाळपाक लोकांनी निश्चेव करपाची गरज आसा, अशें कॅप्टन विरियातो फर्नांडीस हांणी सांगलें.
आंबेली वाठारांत उबारिल्ल्या डॉ. जॅक सिक्वेरा हांकां तांचे जयंती निमतान आर्गां ओंपलीं. ह्या वेळार विरोधी पक्ष फुडारी युरी आलेमांव, आमदार क्रूझ सिल्वा, दक्षीण गोंय काँग्रेस अध्यक्ष सावियो डिसिल्वा, दक्षीण गोंय काँग्रेस अध्यक्ष सावियो डिसिल्वा, अँथनी डिसिल्वा आनी हेर मानेस्त हाजीर आशिल्ले.
युरू आलेमांव हांणी सांगलें, डॉ. जॅक सिक्वेरा हांकां लागून गोंयांत 40 आमदारांक लोकांची सेवा करपाक मेळटा, तशेंच गोंय स्वतंत्र राज्य उरलां. देशांत हे आदीं केन्नाच जनमत कौल जावंक ना. फक्त काँग्रेसीक लागून गोंयांत जनमत कौल जालो आनी गोंयाक राज्याची वळख मेळ्ळी. उत्तरेच्यान दक्षीण गोंयांतले साश्टींत मतमेजणी जाले उपरांत गोंय स्वतंत्र उरता, अशें स्पश्ट जालें. आतां जावपी वेंचणूक ही लेगीत दुसरो जनमत कौल आसा. लोकां खातीर झुजपा खातीर, लोकांच्या प्रस्नां खातीर राज्यांतले विरोधक एकठांय आयल्यात. उदरगतीच्या नांवा खाला पणजी बुडयली. ताका लागून लोकांनी आतां तरी जागे जावचे, अशें आलेमांव हांणी सांगलें.
डॉ. जॅक सिक्वेरा हांणी जनमत कौला वेळार समविचारी लोकांक एकठांय करून जनजागृती केली आनी गोंयकारांक जिखयले. आतांय तशींच परिस्थिती उप्रासल्या. गोंयच्या अस्तित्वाचो प्रस्न निर्माण जाला. विरोधकांनी एकवट दाखयल्या. आतां लोकांनी सांगात दिवचो, अशें आमदार क्रूझ सिल्वा हांणी सांगलें. लोकांच्या तेंक्याक लागून डॉ. सिक्वेरा हांकां येस आयलें. लोकांक लागून फुडारी आसतात. डॉ. सिक्वेरा हांची विचारधारा आपणावन गोंय सांबाळचे खातीर, फुडें व्हरचे खातीर लोकांनी मजत करची, अशें आमदार एल्टन डिकॉस्टा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.