भांगरभूंय | प्रतिनिधी
हे येवजणे खाला सरकारी आनी खाजगी हॉस्पिटलांनी वचून शस्त्रक्रिया करून घेवपाक मेळटा. तिना परस कमी वांगड्यांच्या कुटूंबाक वर्साक 2.50 लाख आनी चारां परस चड जाणाच्या कुटुंबाक वर्साक 4 लाख रुपयां मेरेनचो उपचाराचो खर्च सरकार करता.
गों य सरकारान राज्यांतल्या लोकां खातीर भलायकी सुविधा, अर्थीक लुकसाण भरपाय, भलायकी विमो, सकस आहार तशेंच मेडिक्लॅम येवजण्यो चालीक लायल्यात. कांय येवजण्यो केंद्र सरकाराच्यो जाल्यार चडश्यो गोंय सरकाराच्यो आसात. तातूंतली आयुष्यमान भारत – प्रधानमंत्री जन आरोग्य येवजण (एबी-पीएमजेएवाय) ही येवजण 23 सप्टेंबर 2018 वर्सा हेर देशा वांगडा गोंयांत लागू केल्ली. 2011 वर्सा केल्ल्या जनगणनेच्या आधार घेवन अर्थीक आनी सामाजीक नदरेन कमकुवत वर्गांतल्या लोकांचो वैजकी उपचाराचो खर्च कमी करप, तांकां दर्जात्मक वैजकी सेवा पुरवप ही ह्या येवजणेची मुखेल मोख आसा.
सरकारान पुरायपणान पुरस्कृत केल्ले ह्या संवसारांतल्या सगल्यांत व्हड भलायकी विमा- हमी येवजणे खाला दर कुटूंबाक 5 लाख रुपयां मेरेनचे भलायकी कव्हर दितात. तातूंत हॉस्पिटलाचो आनी वैजकी उपचारांच्या खर्चाचो आसपाव आसता. ह्या उपचारां खातीर सरकारान देशांतल्या हॉस्पिटलांच्या नांवाची वळेरी तयार केल्या. तातूंत हो उपचार उपलब्द आसा. गोंयांत पीएम-जेएवाय वरवीं 1650 तरेच्या दुयेंसाचेर उपचार करपाक मेळटात. हे येवजणेचो लाव देशांतल्या 10.74 कोटी गरीब आनी अर्थीक दुर्बल घटकांतले लोक हे येवजणेचो लाव घेवपाक शकतात. (सुमार 50 कोटी लोकांनी तिचो लाव घेतला). भलायकी सेवा घेतात थंय लोकांक वैजकी उपचाराचे आनी हॉस्पिटलाचे पयशे दिवपाक पडनात. कुटूंबाचो आकार, पिराय आनी लींग हे विशीं कसलेच निर्बंद नात. सरकारान नेमून दिल्ल्या सरकारी आनी खाजगी हॉस्पिटलांनी लाबार्थ्यांक उपचारा खातीर वचपाक मेळटा.
दीन दयाळ स्वास्थ सेवा येजवण (डीडीएसएसवाय) ही गोंय सरकाराची सगल्यांत लोकप्रिय भलायकी येवजण आसा. वैजकी सेवा दुसऱ्या पांवड्यार व्हरपाची हे येवजणेची मोख आसा. राज्यांतल्या लोकांक दर्जेदार वैजकी सेवा उपलब्द करून दिवन बरे उपचार करपाची वेवस्था सरकारान हे येवजणे वरवीं केल्या. हे येवजणे खाला सरकारी आनी खाजगी हॉस्पिटलांनी वचून शस्त्रक्रिया करून घेवपाक मेळटा. तिना परस कमी वांगड्यांच्या कुटूंबाक वर्साक 2.50 लाख आनी चारां परस चड जाणाच्या कुटुंबाक वर्साक 4 लाख रुपयां मेरेनचो उपचाराचो खर्च सरकार करता. ताचे परस खर्चाचो दावो करपाक
मेळना. कुटूंबांतल्या एकल्याक वा सगल्यांक हे येवजणेचो लाव घेवपाक मेळटा.
मेडीक्लेम येवजणे खाला गोंयांत फाटल्या 15 वर्सां पसून राबितो आशिल्ल्यांक गोंयांतल्या हॉस्पिटलांनी मेळनाशिल्ले सुपर स्पेशिलिटी उपचार करून घेवपाक अर्थीक मजत मेळटा. सीएआरडी डायलेसीस (रू. 15,00 पीएम, 15600 पीएम @ रू. 1300 दर डायलेसीस, 12 डायलेसीसा खातीर), प्लास्टिक सर्जरी (रू. 1.5 लाख), आयसीयू, एनआयसीयू, पीआयसीयू, ट्रॉमा कॅर (रू, 1.5 लाख), रेडिओथॅरेपी, कॅमोथॅरेपी (कॅन्सर रू, 5 लाख) कॉक्लेर इम्प्लांट (रू, 1.5 लाख), स्पॉस्टीक चाल्ड, सॅरेब्रल पाल्सी, स्केलेटल डिफॉर्मेटीस (रू, 1.5 लाख), बॉन मेरो ट्रान्सप्लांट (रू. 8 लाख) हे ते सुपर स्पेशिलिटी उपचार आसात. ह्या उपचारां खातीर गोंयांतल्या आनी देशांतल्या वट्ट 39 हॉस्पिटलांची वळेरी उपचार आनी शस्त्रक्रिये खातीर केल्ली आसा.
कुटूंब नियोजन लुकसाण भरपाय येवजण आसा. जी नसबंदी शस्त्रक्रिये मजगतीं मरण आयल्यार, शस्त्रक्रिया अपेशी जाल्यार वा कसलीय गुंतागूंत जाल्यार अर्थीक भरपाय दिता. मेल्यार रू 4 लाख, हॉस्पिटलांतल्यान डिस्चार्ज दितकूच 30 दिसां भितर मरण आयल्यार रू 1 लाख आनी शस्त्रक्रिया अपेशी जाल्यार रू 60,000 आनी गुंतागूंत जाल्यार 50,000 रुपयांची लुकसाण भरपाय दितात.
जननी सुरक्षा येवजणेचें उद्दिष्ट संस्थात्मक वाळंतपणान चालना दिवपाचें आसा. जिचे वरवीं आवय आनी भुरग्यांचें मरपाचे प्रमाण उणे करपाक मजत करता. बीपीएल कुटूंबां वा एसी-एसटी समाजांतल्या गांवगिऱ्या वाठारांतल्या बायलां खातीर 700 रुपया आनी शार वाठारांतल्या बायलां खातीर 600 रुपया मेळटात.
टीबी दुयेंसाचो उपचार घेवपाक दुयेंतींक तयार करपा खातीर तांकां मानधन दिवपाची येवजण आसा. हे येवजणे खाला नव्या दुयेंतींक रू 1000, पयलींच्या दुयेतीक रू 1500 आनी वखद प्रतिरोधक टीबी दुयेतीक रू. 5000 राष्ट्रीय टीबी निर्मूलन कार्यावळी खाला मेळटात.
तशेंच खाजगी वेवसायिकांक टीबी दुयेंतीची अधिसूचोवणी मेळोवपा खातीर उर्बां दितात. जाचे खाला अंतर्गत अधिसूचोवणे खातीर 500 रुपया आनी टीबी दुयेंत प्रकरणांचे निकाल नियुक्त करपा खातीर 500 रुपये दितात. निक्षय पोशण येवजणे खाला टीबी दुयेंतींक उपचारा खातीर दर म्हयन्याक 500 रुपयांची पोशण मजत दितात. भलायकेच्या मळाचेर गोंय सरकाराच्यो जायत्यो येवजण्यो आसात. ह्या सरकाराच्या काळांत त्यो योग्य तरेन चालीक लागल्यात. चडांत चड लोकांनी ह्या येवजण्यां विशीं म्हायती करून घेवपाक जाय. ताचो लाव घेवपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
