भांगरभूंय | प्रतिनिधी
पणजी, बातमीदार ः पणजेच्या लेखा संचालनालयाच्या पोरणे इमारतींतले तिजोरेंत सुमार 5000 दुर्मिळ नाण्यांचो खजिनो मेळ्ळा. किंग व्हिक्टोरिया आनी किंग विल्यम हांचीं चित्रां आशिल्लीं ३३ दुर्मिळ नोंटां सयत मोलादीक भांगरा नाणीं हांतूत आसात, अशीं म्हायती मुख्यमंत्री डॉ. प्रमोद सावंत हांणी आयज पत्रकार परिशदेंत दिली.
‘फाजेंत’ इमारतींत (Fazenda building) आदीं लेखा संचालनालयाचें कार्यालय आशिल्लें. ह्याच सुवातेर एके तिजोरेंत दुर्मीळ वस्त दवरिल्ल्यो. 1961 वर्सा गोंय मुक्त जाले उपरांत 1992 वर्सा ही तिजोरी उगडलेली. ते उपरांत आतां परतून ती उगडली अशें मुख्यमंत्र्यान सांगलें.
अर्थ खात्याच्या मुखेल सचिवाच्या अध्यक्षतेखाला समिती तयार करून ही तिजोरी उगडपाचो निर्णय घेतलो. ती उगडली आनी तातूंत १०० किलो परस चड वजनाचीं वट्ट ५००० दुर्मीळ नाणीं मेळ्ळीं आनी तीं वेगवेगळ्या कालखंडातलीं आसात. हाचे भायर 33 दुर्मिळ नोटीं आनी 2.234 किल भांगराच्यो वस्तू आनी एका पोतयेंत मोलादीक अलंकार मेळ्ळे. हाचे भायर पोरन्या काळांत घरांनी वापरिल्ल्यो वस्तूय सांपडल्यात. हांतूत आरतीचें ताट, पणट्यो, पोरणें पुजेच्या सामानाचोय आस्पाव आसा. लोकांक पळोवपा खातीर गोंयच्या म्युझियमांत ह्यो वस्ती दवरतले अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
