भांगरभूंय | प्रतिनिधी
मे म्हयन्यांत जातल्यो मुलाखती
पणजी, खबरां मेज: गोंय समग्र शिक्षा वतीन राज्यांतल्या सरकारी तशेंच अनुदानीत माध्यमीक विद्यालयां, सरकारी आनी अनुदानीत उच्च माध्यमीक विद्यालयांनी प्रशिक्षकांचीं पदां भरपा खातीर अर्ज मागयल्यात. राष्ट्रीय कुशळटाय पात्रताय फ्रेमवर्क ह्या विशया खातीर ह्या शिक्षकांची भरती करतले. हीं पदां कंत्राटी पद्दतीचेर आसतलीं. तशेंच हे खेपो ५७ पदां भरतले.
२०२४ ते २०२५ ह्या शिक्षणीक वर्सा खातीर ही नियुक्ती जातली. हातूंत इलेक्ट्रॉनिक्स (६ पदां), आयटी (२), लॅजिस्टिक्स (१), बीएफएसआय (२), ट्रॅव्हल टुरिझम (१२), ब्युटी व्हेलनेस (३), ऍप्पारेल्स (१), प्लंबींग (३), ऑटोमोबायल्स (६), रिटेल (३), कंस्ट्रक्शन (३), हॅल्थकॅअर (५), ऍग्रीकल्चर (५), दिवचल, बार्देश, सत्तरी आनी काणकोणा खातीर ब्लॉक रिसोर्स पर्सन्स (४), अकावंट ऑफिसर (१), दक्षिणेंत डाटा एन्ट्री ऑपरेटर (१) ह्या पदांचो आसपाव आसा.
ह्या पदां खातीर ८ आनी ९ मे अशे दोन दीस पर्वरीच्या शिक्षण संचालनालयांत मुलाखती जातल्यो. इन्स्ट्रक्टर पदा खातीर वेंचून काडिल्ल्या उमेदवारांक दर म्हयन्याक २० हजार पगार दितले. तांची राज्यांत खंयसरूय नियुक्ती जावपाक शकता. डाटा एन्ट्री ऑप्रेटर्सांक १५ हजार रुपया जाल्यार ब्लॉक रिसोर्स पर्सन्स आनी अकावंट ऑफिसर ह्या पदां खातीर वेंचून काडिल्ल्या उमेदवारांक दर म्हयन्याक २५ हजार पगार दितले. मुलाखतीची वेळ, सुवात, शिक्षणीक पात्रताय आनी हेर म्हायती जाणून घेवपाक राज्य शिक्षणीक संशोधन आनी प्रशिक्षण मंडळाचे www.https://scert.goa.gov.in मंडळाचे हे वेबसायटीक भेट दिवची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
