भांगरभूंय | प्रतिनिधी
पणजीः गोंयच्या पयसुल्ल्या वाठारांतल्यान गोंय विद्यापीठांत शिकपी भुरग्यां खातीर तालुका मुख्यालया सावन पणजे बस स्टेंडार सरळ सेवा करपाचो विचार आसा. हे खातीर आमी चार बसींची तजवीज करतले. एक म्हयन्या भितर ह्यो बसी चालीक लावपाचे आमी यत्न चलयल्यात, अशें कदंब येरादारी म्हामंडळाचे वेवस्थापकी संचालक रोहन कासकार हांणी सांगलें.
गोवा फॉरर्वड पक्षाच्या विद्यार्थी विभागान हे विशीं कदंब म्हामंडळाक निवेदन भेटयले उपरांत कासकार उलयताले. गोंय विद्यापीठांत पयसुल्ल्यान शिकपी भुरग्यां खातीर तीन ते चार बसी बदलच्यो पडटात, देखून दर म्हालांतल्यान एक बस सेवा सरळ गोंय विद्यापिठा मेरेन दिवची अशी मागणी आमी निवेदन भेटोवन केलां. मात सद्या चार म्हालांचे क्लस्टर करून पणजे मेरेन बस दिता म्हण सांगलां. मात जाता जाल्यार गोंय विद्यापिठा मेरेन ही बस सेवा दिवपाचो यत्न करचो, अशी मागणी गोवा फॉरर्वडचे विद्यार्थी विभागाचे विशाल गांवकार हांणी केल्या.
हे विशीं अदीक म्हायती दितना कदंबचे वेवस्थापकी संचालक रोहन कासकार हांणी सांगलें, सत्तरी, धारबांदोडें, सांगें अश्या म्हालां खातीर म्हाल मुख्यालया सावन पणजे गोंय विद्यापीठ मेरेन सरळ सेवा दिवची अशी मागणी विद्यापीठ्याच्या विद्यार्थ्यांनी केल्या.
हे विशींचें एक निवेदन आमकां स म्हयन्यां पयलीं आयिल्लें. हे विशीं आमी काम करतात आनी काणकोण, धारबांदोडें, सांगें आनी वाळपय ह्या म्हाल मुख्यालया सावन ते पणजे बस स्टँड आमी रोखडेच चार बसी सुरू करतले. हेर म्हाल जशे, पेडणें, बार्देस आनी फोंडें सावन सरळ बस सेवा पणजे बस स्टेंड मेरेन आसा, अशी म्हायती कासकार हांणी दिली.
तांणी गोंय विद्यापीठ मेरेन सरळ बसींची मागणी केल्या. मात ह्यो बसी खासा विद्यार्थ्यां खातीर नासतल्यो. सामान्य प्रवाश्यांक हे बसींचो वापर करपा खातीर मेळटलो. देखून ह्यो बसी पणजे बस स्टँडाचेर वयतल्यो. आमी तांकां सांगलां, स्मार्ट सिटी खाला इव्ही बस सेवा दर १० ते १५ मिण्टां भितर पणजे बस स्टेंडा सावन गोंय विद्यापिठा कडेन वयतात. तांणी हे बसींचो वापर करचो, असो सल्लो कासकार हांणी दिला.
समजा काणकोण सावन पणजे येतले जाल्यार मडगांव कदंब बस स्टँडाचेर देंवून पणजे बस धरची पडटाली. पूण तांकां मडगांव सोडून काणकोण सरळ बस सेवा जाय. आमी तांकां एक म्हयन्याचो वेळ दितां म्हण सांगलां. सद्या आमकां नव्यो इव्ही बसेस येवपाच्यो आसात. ते बसींच्या जाग्यार ज्यो ५० सिटर डिजल बसी उरतल्यो त्यो आमी ह्या मार्गार घालतले, अशी म्हायती कासकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
