भांगरभूंय | प्रतिनिधी
पणजी: गोंयांत पयलेच फावट डिप्लोमा इन टिचींग इंडियन सायन लँग्वेज (DTISL- भारतीय सांकेतीक भाशा अध्यापन पदविका) हो अभ्यासक्रम गोंय विद्यापीठ कॅम्पसांत सुरू जाला. राज्य दिव्यांग आयुक्त कार्यालयाच्या फुडाकारा खाला केंद्रीय दिव्यांगजन सक्षमीकरण विभाग, समाजीक न्याय आनी सक्षमीकरण मंत्रालय, भारत सरकार हांच्या जोड पालवान नॅशनल इन्स्टिट्यूट ऑफ स्पीच अँड हिअरिंग डिसॅबिलिटीज (AYJNISHD) आनी गोंय विद्यापीठ हांचे मदीं जाल्ल्या समजिकय कबलाती वरवीं हो अभ्यासक्रम चालीक लायतात.
खंयचेच शारिरीक तांकी पुरतोच विचार दवरिनासतना दरेका व्यक्तीक समान संद दिवपा विशीं गोंय राज्यान आपणायल्ले लागणुकेचें म्हत्व ह्या डीटीआयएसएल अभ्यासक्रमाक सुरू करपा फाटल्यान आशिल्लें. कुशळ सांकेतीक भास, शिक्षकांची उदरगत करीत, मूक (डेफ) तशेंच श्रवणदोष आशिल्ल्या व्यक्तींक दर्जेदार शिक्षण दिवन तांकां समाजाच्या सगळ्या मळांचेर वांटेकार जावपाची संद दिवपाचे नदरेन एक सकारात्मक पावल उबारलां.
हे विशीं राज्य दिव्यांगजन आयुक्त गुरुप्रसाद पावसकर हांणी सांगलें, गोंय विद्यापीठांत भारतीय सांकेतीक भाशा शिकोवपा विशीं डिप्लोमा इन टिचींग इन्डियन साइन लँग्वेज (डीटीआयएसएल) हो अभ्यासक्रम सुरू जाता. ही गजाल सगळ्यां खातीर एक इतिहासीक आनी अभिमानाची गजाल. हो अभ्यासक्रम विद्यार्थ्यांक प्रभावी सांकेतीक भाशा शिक्षक जावपा खातीर आनी फुडाराक रोजगाराच्यो संदी मेळोवन दिवपा खातीर सज्ज करतलो.
डिप्लोमा इन टिचिंग इंडियन सायन लँग्वेज हो अभ्यासक्रम गोंय राज्यांतलें सर्वसमावेशक शिक्षण आनी सक्षमीकरणाच्या मळार म्हत्वाचें योगदान दितलो अशी अपेक्षा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
