भांगरभूंय | प्रतिनिधी
मडगांव, प्रतिनिधी : कॉंग्रेसींतल्यान भाजपांत प्रवेश करपी पयल्या गटांत आशिल्ल्या विल्फ्रेड डिसा हांकां विधानसभा वेंचणुकेंत अपेस आयिल्लें. आतां लोकसभा वेंचणुकेंत डिसा हांची घरकान्न तशेंच नुवें सरपंच फ्रेडा डिसा हांणी कॉंग्रेसीन दिल्लो उमेदवार कॅ. विरियातो फर्नांडीस हांची दक्षीण गोंयाक गरज आशिल्ल्याची भुमिका घेतल्या.
कॉंग्रेसीचे तिकेटीचेर वेंचून येवन उपरांत बाबू कवळेंकार हांचे सयत भाजपांत प्रवेश करपी आमदारां मदीं नुवें मतदारसंघाचे आदले आमदार विल्फ्रेड डिसा हांचो आसपाव आशिल्लो. उपरांत अपक्ष वेंचणूक लढपी विल्फ्रेड हांकां मतदारांनी पुरायेन न्हयकारलें आनी कॉंग्रेसीचे तिकेटीचेर वेंचणूक लढपी आलेक्स सिक्वेरा हांकां वेंचून हाडलें. मात, दुसर्या टप्प्यांत भाजपांत वचपी आमदारां मदीं सिक्वेरा हांचोय आसपाव आशिल्लो. आतां नुवेंच्या समविचारी लोकांनी कॅ. विरियातो फर्नांडीस हांकां वेंचून हाडपा खातीर फुडाकार घेतला. हातूंत नुवेंची सरपंच तशेंच आदले आमदार विल्फ्रेड डिसा हांची घरकान्न फ्रेडा हांचो वांटो आसा. विल्फ्रेड हे सध्या सक्रीय नात. दक्षीण गोंयचो जागो जिखपा खातीर भाजपा यत्न करता. तेन्ना डिसा हांचें फाटबळ भाजपाक गरजेचें आसतलें. मात सध्या तांची घरकान्न फ्रेडा हांणी इंडी आघाडेच्या उमेदवाराक वेंचून हाडपाचो उलो मारला.
फ्रेडा डिसा हांणी, कॅ. विरियातो फर्नांडीस हे निवृत्त नेव्ही अधिकारी. तांणी कारगिलच्या झुजांतूय वांटो घेतला आनी आता गोंय वाटावपा खातीर आदींय जाल्ल्या आंदोलनांनी तांणी वांटो घेतला. जो मनीस देशासाठी लढला, भारतीयां खातीर लढला, तांकां गोंय वाटावपाक फाटबळ दिवपाची जापसालदारकी गोंयकारांची. नुवें मतदारसंघांत जायत्यो समस्या आसात. रेल्वे दोट्टीकरण, कोळशाची येरादारी, न्हंयांचें राष्ट्रीयीकरण आनी हेर समस्यां वेळार कॅ. विरियातो हे सदांच लोकां फाटल्यान उबे रावल्यात. ताका लागून नुवेंच्या लोकांनी एकठांय येवन पंचायत मंडळाक विचारलें, दक्षीण गोंयां खातीर कॅ. फर्नांडीस हांची गरज आशिल्ल्याचें मत नुवें मतदारसंघांतल्या नागरिकांनी उक्तायलां. ते प्रमाण आघाडीचे उमेदवार कॅ. विरियातो हांकां वेंचून हाडपा खातीर यत्न करतले, अशें फ्रेडा डिसा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
