भांगरभूंय | प्रतिनिधी
पणजीः गोंय लोक सेवा आयोग (जीपीएससी) वेगवेगळ्या खात्यांत १६ पदां खातीर भरती करपाचें आसा. हातूंतल्यो १० सुवातो पशुवैजकी अधिकार्यां खातीर आसात. जाल्यार दोन सुवातो ट्रान्स्फर ऑन डेप्यूटेशनच्यो आसात. ह्यो दोन सोडल्यार हेर सुवातां खातीर आयोगा वेबसायटी वरवीं ऑनलायन अर्ज करपाची निमाणी तारीक २२ नोव्हेंबर आसा.
पशुवैजकी अधिकार्यांचीं १० पदां राखीव आसात. ह्या पदां खातीर म्हयन्याक ३९ हजार रुपया पगार दितले. हे खातीर उमेदवारांक पशुवैजकी कायद्या खाला गरजेची पात्रताय आसपाक जाय आनी गोंय पशुवैजकी मंडळांत नोंदणी जाल्ली आसपाक जाय. गोंय वैजकी म्हाविद्यालयांत सहाय्यक प्राध्यापकांच्या तीन पदांचेर भरती जातली. हाचे खातीर ४५ हजार म्हयन्याक पगार दितले. हे खातीर उमेदवारां कडेन वैजकी मळार पदव्युत्तर पद्वी आसप गरजेचें.
कामगार खात्या खाला ईएसआय हॉस्पिटलांत वरिश्ठ ऑर्थोपेडिक सर्जन पदाचेर भरती जावपाची आसा. तशेंच कारखानो आनी बॉयलर विभागांत प्रकल्प अधिकारी जाग्याचेर भरती जातली. भलायकी खात्यांत कनिश्ट रेडियोलॉजिस्टाची नेमणूक जावपाची आसा. उतर विज्ञान आनी तंत्रज्ञान खात्यांत उपसंचालक आनी संग्रहालय विभागांत क्युरेटर ह्या ट्रान्स्फर ऑन डेप्यूटेशन पद्धतीन भरतले.
अर्ज भरचे पयलीं उमेदवारांनी आयोगाचे वेबसायटीचेर आशिल्ल्यो सुचोवण्यो वाचच्यो. अर्जाचेर मोबायल नंबर आनी ई-मेल योग्य रितीन बरोवचें असो उलो आयोगान मारला. आयोग अर्जांची बारीकसाणेन चवकशी करतलो आनी उमेदवारांक मुलाखती खातीर आपयतलो. भलायकी खात्यांतल्या वरिश्ठ पदां खातीर गरज पडल्यार कोंकणी भाशेची गरज सरकाराचे शिफारशी उपरांत शिथील करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
