भांगरभूंय | प्रतिनिधी
मार्च 2029 मेरेन लसीकरण चालू दवरपा खातीर येवजण
पणजी: गोंय हें रेबीज मुक्त राज्य सेगीत दवरपा खातीर शिमे वेल्या म्हालांतल्या सुण्यांचें लसीकरण जातलें. हाचे खातीर मार्च 2029 मेरेन लसीकरण करपी येवजण तयार केल्या. गोवा फावंडेशनाच्या गोरवां चिकित्सा फांट्या वरवीं ही मोहीम सुरू उरतली. तीन वर्सां खातीर 2 कोटी 96 लाख रुपयांची अर्थीक मजत दिवपाची तजवीज आसा. वर्साक 98 लाख हे प्रमाण ही मजत मेळटली.
मालकीच्या आनी रस्ताद सुण्यांक लस दिवन वा लस दिवपाची खात्री करप. शिमे वेले गोंयचे म्हाल आनी महाराष्ट्र , कर्नाटकाचे शिमेंतल्या म्हालांतल्या सुण्यांक लस दिवपाची तजवीज आसा. जनावरांत वा मनशांत पॉझिटिव्ह केस मेळ्ळ्यार लागींच्या वाठाराक रींग करून लस दिवप, कोरोना ना करपा खातीर लस दिवप वा लस दिवपाची मोहीम करप, रेबीज दुयेंसांतल्यान नागरिकांची सुरक्षीतताय सुनिश्चीत करप, गोंयांत रेबीज मरण उणें करप. हीं येवजणेचीं उद्दिश्टां आसात. मिशन रेबीज मोहीम ट्रस्ट वर्ल्डवाइड वरवीं वर्ल्डवाइड पशूवैजकी सेवा प्रकल्प पशूवैजकी सेवा गोवा फावंडेशना वतीन चालू उरतली. मार्च, 2029 मेरेन मोहीम सुरू उरतली.
शिमे वयल्या म्हालांतल्या सुण्यांक लस दिवप ही मुखेल जापसालदारकी आसतली. पेडणें, दिवचल, सत्तरी, धारबांदोडें आनी काणकोण ह्या शिमे वेल्या म्हालांतल्या सुण्यांची तपासणी जातली. गरज पडल्यार लसीकरण जातलें. ते भायर वेंगुर्ले, सावंतवाडी, दोडामार्ग, कारवार आनी अंकोला ह्या हेर शिमे वेल्या म्हालांतूय लसीकरण जातलें. हेर राज्यांतल्या शिमे वेल्या सुण्यांक लागून गोंयांत रॅबीज पातळपाचो धोको आसता. हाचे खातीर ही जतनाय घेतले.
मालकीच्या सुण्यांक आनी रस्ताद सुण्यांक दोनूय प्रकारांक रींग लस आनी खाशेली लस दिवपाची मोहीम सुरू जातली. एका वर्सांत सुमार 10000 सुण्यां खातीर लस दिवपाची येवजण आसा. जेन्ना जेन्ना खंयच्याय एका मनशांक रॅबीज जावन पॉझिटिव्ह अहवाल येता, त्या जाग्याचेर जागृताये सयत 3 किमि वाठारांत लसीकरण जातलें.
गोंय राज्यांतल्यान खंयच्याय दुबावीत रेबीज दुयेंतीची चवकशी पळोवणी पंगड करतलो.
हे मोहीमेत 24/7 ही हॉटलायन सेवा चालू उरतली. पुराय गोंय राज्यांतल्यान आनी शिमे वयल्यान दुबावीत रेबीज दुयेंतींची तपासणी जावन अहवाल तयार जातलो. सगल्या दुबावीत दुयेंतींची नेमान चांचणी चालू उरतली. शिक्षण, लसीकरण भौशीक कागाळींक सुचोवणी आनी प्रतिसाद, लसीकरणाचेर लक्ष दिवपा खातीर खासा मनशांची सोय आसतली.
सुण्याक धरप, लस दिवप, मोहिमेचेर नदर दवरप हाचे खातीर खासा मनीसबळ आसतलें. मनीसबळ, वाहन हाचे खातीर निधीची तजवीज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
