भांगरभूंय | प्रतिनिधी
सिने दिग्दर्शक राजदत्तः गायनांतल्यान जागृताय करपाचो मोलादीक वावर
भांगरभूंय । प्रतिनिधी
फोंडें: संवसारीक नामनेची गायिका लता मंगेशकार हांणी गोंय मुक्ती खातीर दिल्ल्या योगदानाची कल्पना अजून मेरेन उक्ती जावंक नाशिल्ली. गोंय मुक्ती खातीर लता दीदीन गायनांतल्यान लोकांक जागृत करपाचो व्हड वावर केल्लो. तेचवांगडा आपली दिग्दर्शनाची वाटचाल येसस्वी करचे खातीर लता दीदीन आदार केलो. एक म्हान गायिका जाल्ल्या लता मंगेशकार हांच्या गांवांत आपलो जिणे गौरव पुरस्कार दिवन भोवमान करप हें आपलें भाग्य, अशें सिने दिग्दर्शक राजदत्त हांणी सांगलें.
चतुरंग प्रतिष्ठाना वतीन जिणे गौरव पुरस्कार सिने अभिनेते अनुपम खेर हांचे हस्तुकीं सिने दिग्दर्शक राजदतात हांकां भेटयलो. यादस्तीक चिन्न, मानपत्र आनी 3 लाख रुपयांचो चॅक ह्या वेळार राजदत्त हांचे सुवादीन केलो. राजीव गांधी कला मंदिराच्या सभाघरांत आयोजीत केल्ले कार्यावळींत मुख्यमंत्री डॉ. प्रमोद सावंत, सुधीर जोगळेकर, विजय कवळेंकार, आदले खासदार नरेंद्र सावयकार आनी अजय वैद्य ह्या वेळार माचयेर हाजीर आशिल्ले.
गोंय मुक्ती खातीर महाराष्ट्रांतल्या एकाच विचाराचे कितलेशेच तरणाटे एकठांय आयिल्ले. त्या वेळार गोंय मुक्ती खातीर तरणाट्यांनी सत्याग्रहांत वांटो घेतिल्लो. लता दीदीन सत्याग्रहांत प्रत्यक्षांत वांटो घेवंक नाशिल्लो तरीय गायनांतल्यान निधी उबारिल्लो. लता दीदीन केल्ल्या वावराची दखल घेवंक नाशिल्ल्याचें राजदत्त हांणी सांगलें.
चित्रपटाच्या संवसारांत म्हान वावर केल्ल्या राजदत्त हांकां जिणे गौरव पुरस्कार दिवन चतुरंग प्रतिष्ठानान पुरस्काराचो मान वाडयला. जिवीत येसस्वी करचे खातरी ध्येयनिश्ठा आनी प्रामाणीकपणाची खर गरज आसा. राजदत्त हांणी खूबशे कलाकार घडयले. जिणें गौरव पुरस्कारांत फुडारांत ड्रामा स्कुला वतीन दोन लाख रुपया जमा करतले, अशें अनुपम खेर हांणी सांगलें. डॉ. दत्ताराम देसाय हांणी येवकार दिलो. कुमार सरज्योतिषी हांणी उपकार मानले. जाल्यार सिद्धी उपाध्ये हांणी सुत्रसंचालन केलें.
स्वातंत्र्य सैनिकांक मान दिवपाचो यत्नः मुख्यमंत्री
गोंय मुक्ती खातीर दिल्लें योगदान आनी नवें कलाकार घडोवपा खातीर राजदत्त हांणी केल्ले यत्न फुकट वचूंक ना. नव्या कलाकारांक माची दिवन राजदत्त हांणी कुटुंबांची पोटापाण्याची वेवस्था केली. गोंय मुक्तीचीं 60 वर्सां मनयतनाच सरकारान दरेका स्वातंत्र्य सैनिकांक मान दिवपाचो यत्न केला, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
