भांगरभूंय | प्रतिनिधी
पणजी, प्रतिनिधी: सेगीत स फावट खासदार म्हण वेंचून आयिल्ले खातीर गोंय भंडारी समाजान श्रीपाद नायक हांकां परबीं भेटयलीं. ‘एक भंडारी, नेक भंडारी, लाख भंडारी’ हें भाऊन ह्या निकाला वरवीं दाखोवन दिलां, अशें भंडारी समाजाचे कार्यकारणी समितीन म्हटला.
गोंय भंडारी समाज केंद्रीय कार्यकारणी समितीचो अध्यक्ष अशोक नायक हांणी पत्र बरोवन श्रीपाद भाऊंक परबीीं भेटयलीं. पत्रांत म्हणलां, उत्तर गोंय सावन श्रीपाद (भाऊ) नायक हे व्हडा मतांनी जैतिवंत जाल्यात. तातूंत भंडारी समाजाचो वाटो तितलोच व्हड आसा. भंडारी समाजाचो एकवट जैतांतल्यान दिसून आयला.
‘एक भंडारी, नेक भंडारी, लाख भंडारी’ हें निकालांतल्यान तुमी दाखोवन दिलां. भंडारी समाजाची उर्बा आनी तांक असामान्य आसा. ती संघटीत आनी सुत्रबद्ध रावल्यारूच भंडारी समाजाक निश्चीतूच दिका मेळटली. फुडले पिगळेच्या फुडरा खातीर आनी तुमचीं राजकी उदिश्टां साध्य करपा खातीर आपापले भितर मतभेद आनी दुस्वासाक पुर्णविराम दिवप हें सगळ्यांच्याच हिताचें आसा, अशें नायक म्हणटा.
भंडारी सामाजाचे खुबशे प्रस्न आसा जे सुटूंक ना. संघर्श आजूनय सोपूंक ना. देखून लढपाची तांक कायम दवरूया आनी संघटीत रावन येता त्या आव्हानांक तोंड दिवया, अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
