भांगरभूंय | प्रतिनिधी
भांगरभूंय । प्रतिनिधी
बेळगांवः गोंयांतल्यान कर्नाटकांत जावपी सोऱ्याचे बेकायदेशीर येरादारीचेर खर नदर दवोरतना बेळगांवच्या अबकारी अधिकाऱ्यांनी 1 मार्च तें आतां मेरेन 1 कोटी रुपयां परस चड मोलाचो सोरो जप्त केला. बेळगांव, खानापूर, रामदुर्ग, सौदत्ती आनी बायहोंगल तालुक्यांच्या अबकारी चेक नाक्यांचेर सोरो जप्तीची कारवाय केली. खानापूर तालुक्यांत गोंयांतल्यान हाडल्लो सोरो चड प्रमाणांत जप्त केला.
गोंयांतल्यान सवाय दरांतलो सोरो बेकायदेशीरपणान हाडून तो कर्नाटकांत विकपाचो वेवसाय कर्नाटकांतलो सोरो वेवसायीक करीत आसतात. कर्नाटक विधानसभेचे वेंचणुकेचे फाटभुंयेर कर्नाटकांत सोऱ्याक चड मागणी आशिल्ल्यान चोरयां सोरो हाडपाचे प्रकार मार्च म्हयन्यांत वाडल्यात. बेळगांवची बिर्याणी आनी गोंयचो सोरो दिवंन मतदारांक आपले वटेन करपाचो उमेदवारांचो यत्न आसता. गोंयांत तयार जावपी सोरो व्हडा प्रमाणांत कर्नाटकांत येतलो हें खबर आशिल्ल्यान अबकारी खात्यान शीम वाठारांत गस्ती वाडयल्या.
गोंयांत चोरयां जावपी सोरो येरादारीचेर नदर दवोरपा खातीर बेळगांवच्या अबकारी अधिकाऱ्यांनी कणकुंबी, लोंढा आनी शिनोली हांगा चेक नाके उबारल्यात. कारवार जिल्ह्यांत येवपी अनमोड चेक नाक्यार आतां मेरेन सगल्यांत चड सोरो जप्त केला. 1 मार्च सावन अबकारी अधिकाऱ्यांनी चोरयां हाडटात तो सोरो जप्त करपाची मोहीम खर केल्या. गोंयांतल्यान येवपी दरेका वाहनाची कडक तपासणी सुरू केल्या. बेळगांवच्या दक्षीण विभाग अबकारी अधिकाऱ्यांनी आतां मेरेन गोंयांतल्यान हाडटालो तो 7520.435 लीटर सोरो जप्त केला. ताचें मोल एक कोटी रुपया परस चड आसा. अशी म्हायती अबकारी अधिक्षक हिरेमठ हाणे दिली.. सोमार 27 मार्चाक गोंयांतल्या बंगळुरू वचपी एक टुरिस्ट बस अबकारी अधिकाऱ्यांनी आडावन तिची तपासणी केली तेन्ना लीटर सोऱ्याचो बाटल्यो मेळ्ळ्यो अशे ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
