भांगरभूंय | प्रतिनिधी
पणजी: गोंयची दर्यादेग आनी सुरक्षा वेवस्था अदीक घटमूट करपा खातीर गोंय पुलिशेन एक नवी, आधुनीक ‘फास्ट पेट्रोल बोट’ (Fast Patrol Boat) घेवपाची प्रक्रिया सुरू केल्या. ह्या बोटी खातीर अदमाशेक 3.40 कोटी रुपयांचो खर्च येवपाचो आसा. दर्यांतल्यान जावपी बेकायदेशीर गजालींक आनी सुरक्षेच्या घाताक आळाबंदा हाडपा खातीर ही बोट मोलाची थारतली.
गोंय पुलीस मुख्यालयांतल्या केंद्रीय खरेदी कक्षान जारी केल्ल्या निविदेंतल्यान मेळिल्ले म्हायती प्रमाण 15 मिटर लांबाय आशिल्ली बोट बेगीन आनी प्रभावी काम करपा खातीर तयार करतले.
हे बोटीक दोन इनबोर्ड डिझल इंजीन बसयिल्ले आसतले. हे बोटीचो उण्यांत उणो वेग 25 नॉट्स आनी 20 नॉट्स ताचो क्रुझींग वेग आसतलो.
हे बोटीर 4 कर्मचाऱ्यांचे पंगड आसतलो, आनी आपत्कालीन परिस्थितींत 10 जाणांचे प्राण वाटावपाची तांक हे बोटीची आसतली. कंत्राटां जारी जाले उपरांत 6 म्हयन्या भितर ही बोट तयार करून दिवची पडटली.
ही नवी बोट आयिल्ल्यान गोंयच्या सागरी पुलिशेची ताकद खूब वाडटली. सुकतीच्या वा खोल उदकांत दीस आनी रात, केन्नाय गस्त घालपा खातीर तशेंच गरज पडल्यार खोल दर्यांत वचूनय काम करपा खातीर हे बोटीची मजत जातली.
तशेंच दर्यादेगे सावन पयस वचून विशेश मोहिमां वेळार पाळत दवरप. हेर सुरक्षा बोटींच्या सांगाता वांगडा मेळून संयुक्तपणान काम करप. दर्यांत बेकायदेशीरपणान धांवपी खंयच्याय वेगाच्या बोटींक आडावप आनी तांचेर वचून तपासणी करप, दर्यांत बुडप्यां खातीर सोद आनी बचाव मोहीम राबोवप आनी विशेश दळाच्या कारवायांनी मजत करप ह्या बोटींचे उद्दिश्ट आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
