भांगरभूंय | प्रतिनिधी
मंत्री रोहन खंवटेः 2022 पर्यटन मोसम आसतलो नव्या अणभवांचो साक्षीदार
भांगरभूंय । खबरां मेज
पणजीः 2022 पर्यटन मोसम गोंयच्या पर्यटनांत पुराय नव्या अणभवांचो साक्षीदार आसतलो. मुख्यमंत्री डॉ. प्रमोद सावंत हांच्या बिनशर्त तेंक्याक लागून आमकां राज्याच्या पर्यटन मळा वयल्या वेवसायांत सोंपेंपण हाडपा खातीर विवीध प्रक्रिया चालीक लावप शक्य जालें, अशें पर्यटन मंत्री रोहन खंवटे हांणी उजवाडायिल्ल्या पत्रकांत म्हणलां.
नोंदणी आनी प्रमाणनना खातीर दस्तावेज प्रक्रियेंत कपात, दस्तावेजांच्या डुप्लिकेशना बगर सोंपें तरेन नुतनीकरण, उणो ऑपरेशनल प्रतिबंध आनी सदळसाणी सारक्या नवे आनी सुटसुटीत प्रक्रियेचीं कांय व्यापक तासां आसात. तांचो उद्देश गोंयच्या पर्यटन उद्देगांतलो प्रक्रियात्मक कळाव पयस करपाचो आसा. आंतरगांव पर्यटन म्हणल्यार इंटरसॅण्ड टुरिझमांत प्रवेश करप हो एक म्हत्वकांक्षी उपक्रम थारतलो. तातूंत राज्याच्या भितरल्या भागांतल्या चडांत चड लोकांक पर्यटन मळांत आस्पावन घेवप. ते वरवीं चडांत चड रोजगार निर्माण करप आनी महसूल एकठांय करचे खातीर योगदान दिवप. होम स्टेचे प्रक्रियेंत लेगीत अदीक सदळसाण हाडून सेवा दराचे नदरेन होम स्टे धनी आनी पर्यटक अशा दोगांकूय ताचो लाव मेळटलो, अशें पत्रकांत म्हणलां. हॉटेल उद्देगा खातीर प्रक्रियात्मक बंधन आनी कळाव मर्यादा तशेंच कागदपत्रांचे गरजे मदींय व्हड प्रमाणांत कपात केल्या. शॅकांची कार्यप्रणाली तशेंच दर्यादेगेर घालपाची सत्री, खाटी हे सारक्यो सुविधा दिवपाक उण्यांत उण्या कागदपत्रांची गरज लागतली. व्हड खेळगड्यांक आकर्शीत करचे खातीर साहसी खेळांत व्हड प्रमाणाचेर उर्बा दितात. सुरक्षा आनी सेवे कडेन कसलीच तडजोड करिनासतना वॉटर स्पोर्टस् मळाचेर प्रक्रिया सोंपी करपाचो वावर केला, अशें पत्रकांत म्हणलां. गोंयच्या पर्यटन मळाक ह्या सगळ्या उपक्रमांक लागून नवी दिशा मेळटली हातूंत मातूय दुबाव ना, अशेंय फुडें म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
