भांगरभूंय | प्रतिनिधी
पणजी, बातमीदार: गोंय मनरिजवण संस्था, भौशीक भलायकी दंतचिकित्सा विभाग, गोंय दंत महाविद्यालय आनी हॉस्पिटल हांच्या जोड पालवान ३१ मे २०२४ दिसा ६ व्या गोंय तंबाखू विरोधी चित्रपट महोत्सवाचें आयोजन करता.
तंबाखू वापरपाचे वायट परिणाम हे विशीं संदेश दिवपाक जायरात चित्रपट निवडप, तोंडाचो कॅन्सर आनी काळजाच्या दुयेंसाच्यो घडणुको उण्यो करप आनी ह्या चित्रपटांच्या फायद्या बगर प्रदर्शना वरवीं चित्रपट कलेचो प्रचार करप हो ह्या महोत्सवाचो हेत. गोंय धुंवरा पसून मुक्त करप हो निमाणो हेत जावन आसा.
हो महोत्सव गोंय विभाग आनी राष्ट्रीय विभाग अशा दोन विभागांत जातलो. तंबाखू उद्देगाच्या हस्तक्षेपा पसून भुरग्यांची राखण ही ह्या महोत्सवाची संकल्पना.
गोंय विभाग : जायरात चित्रपट. चित्रपट कोंकणी, मराठी, हिंदी वा इंग्लीश भाशेंत आसचे आनी ते गोंयचे निर्माते/ प्रॉडक्शन हावज, गोंयचे व्यक्ती, गोंयांत शिकपी विद्यार्थी, शिक्षणीक आनी समाजीक संस्थांनीच तयार करपाक जाय. जायरात चित्रपट २ मिनिटां परस चड नासचो आनी तातूंत इंग्लीश सबटायटल्स आसचे.
राष्ट्रीय विभाग: जायरात चित्रपट. हो चित्रपट फकत हिंदी वा इंग्लीश भाशेंत आसचो आनी ताची निर्मिती फकत भारतीय निर्मातो/ प्रॉडक्शन हावज, व्यक्ती, विद्यार्थी आनी भारतांतल्या शिक्षणीक आनी समाजीक संस्थांनी करपाक जाय. जायरात चित्रपट २ मिनटां परस चड आसपाक जायना आनी तातूंत इंग्लीश सबटायटल्स आसचे.
पात्र व्यक्ती १९ एप्रील मेरेन नोंदणी फॉर्म भरून स्वताची नोंदणी करपाक शकता. हे सर्ती खातीरचे अर्ज आनी नेम आनी अटी ६ वो गोवा तंबाखू विरोधी चित्रपट महोत्सव नोंदणी अर्ज www.esg.co.inचेर उपलब्ध आसा. चित्रपट प्रवेश स्वीकारपाची निमाणी तारीख १३ मे अशी आसा.
पुरस्कार जैतिवंत जायरात चित्रपटांचो वापर सिनेमा थिएटर/ टीव्ही चॅनेल, शाळा, महाविद्यालयां आनी हेर सरकारी खात्यांच्या कार्यावळींनी आनी इंटरनेटाचेर तंबाखू विरोधी जायरात मोहिमेच्या प्रचारा खातीर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
