भांगरभूंय | प्रतिनिधी
पणजीः अंदुंच्या पयल्या पांच म्हयन्यांनी गोंय पर्यटनाक बळीश्ट प्रतिसाद मेळ्ळो, जाका लागून गोंय हें भारतांतलें एक म्हत्वाचें पर्यटन स्थळ म्हूण परत एकदां सिद्ध जाले. गोंय पर्यटन विभागाच्या ताज्या आंकडेवारी प्रमाण, जानेवारी ते मे 2026 ह्या काळांत गोंयांत वट्ट 46,39,165 पर्यटकांनी भेट दिली. 2025 च्या ह्याच काळाच्या तुळेंत ही वाड 0.39% इतली आसा.
मे 2026त 9,69,090 पर्यटक गोंयांत आयलें. मे 2025 च्या तुळेंत हो आंकडो 4.53% वाडिल्लो आसा. जानेवारी ते मे 2026 ह्या काळांत 44,37,018 भारतीय (domestic) पर्यटक जाल्यार 2,02,147 विदेशी पर्यटकांनी गोंयांत येरादारी केली. संवसारीक पांवड्यावेली आव्हानां आनी भूराजकीय अनिश्चितता आसून लेगीत, गोंयांत पर्यटकांची ही वाड नोंद जावप म्हत्वाची आसा. हे वाडी फाटल्यान कनेक्टिव्हिटी, पर्यटनाची वेगवेगळीं घटकां आनी पर्यटकांचो गोंयार आशिल्लो विस्वास हीं मुखेल कारणां आसात.
पर्यटन मंत्री रोहन खंवटे हांणी सांगलें, “आयज गोंयच्या पर्यटनाची वाड ही कनेक्टिव्हिटी, वैविध्यपूर्ण अणभव आनी वाडिल्ल्या विस्वासाचेर आदारिल्ली आसा. गोंयचे दर्यावेळ नामनेचे आसले तरी पर्यटक आतां गोंयची संस्कृताय, दायज, अध्यात्म, वेलनेस आनी खाद्य संस्कृतायेचो अणभव घेवपा खातीर येता.
गोंयांत आशिल्ल्या दोन विमानतळांक लागून (दाबोळी आनी मनोहर आंतरराष्ट्रीय विमानतळ) गोंयांत वचपा-येवपाची सोय वाडिल्ली आसा. जाका लागून देशांतल्या आनी विदेशांतल्या पर्यटकांक गोंयांत येवप सोपें जालां, अशें तांणी सांगलें.
पर्यटन संचालक केदार नायक हांणी सांगलें, 2026 च्या पयल्या पांच म्हयन्यांत नोंदिल्ल्या ह्या वाडीन गोंयच्या पर्यटन मळार ताकद आनी बदलपी काळान जुळवून घेवपाची तांक दाखवन दिली. आमचो मुखेल हेत पर्यटकांक उत्कृश्ट अणभव दिवपा वांगडाच जबाबदार आनी शाश्वत पर्यटन वाडोवपाचो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
