गोंयां सयत आशिकुशीकच्या राज्यांनी पावसाचो सांवार
भांगरभूंय | प्रतिनिधी
२४ वरांत राज्यांत सरासरी ५.३३ इंच पावस
तिळारी धरणाच्या उदकाचो विसर्ग वाडपाची शक्यताय: लोकांक सादूर रावपाची शिटकावणी
पणजी : फाटलो म्हयनो भर पावसाचेर सांवार आयिल्लो. ह्या सेगीत पडपी पावसाक लागून गोंयांतूच न्हय तर गोंयच्या आशिकुशीच्या राज्यांकूय बरोच फटको बसला. जायते कडेन पालसणां कोसळप, न्हंयांक हुंवार येवप, रस्ते उदका पोंदा वदप, झाडां पडप, लोकांच्या घरांनी उदक भितर सरप, घरांचेर झाडां पडून तशेंच वणटी कोसळून लुकसाण जावप अश्यो जायत्यो घडणुको घडल्यो. ताचे उपरांत दोन दीस पावसान विसव घेतलो. पावसान घेतिल्ल्या सुशेगाक लागून हवामान खात्यान येलो अलर्टूय दिल्लो. मात काल रातच्यान पावसाचेर परत सांवार आयला. घोग्यांनी पडपी पावसाक लागून जायत्या सुवातांचेर हुंवाराची परिस्थती निर्माण जाल्या. गोंयचे रस्ते, पूल उदका पोंदा गेल्यात. ताका लागून लोकजीण विस्कळ्ळ्या.
दिवचले पावसाचो फटको: न्हंयांतल्या उदकाची पातळी चडली
दिवचले म्हालांत बिरेस्तारा सकाळीं उटंगाराच्या पावसान धुमशेण काडलें. सगळ्यो न्हंयो आनी कालवे हुंवारान भरुन व्हावूंक लागले. दिवचले न्हंयेच्या उदकाची पातळी वाडिल्ल्यान पुराय वाठारांत हुंवाराची परिस्थिती निर्माण जाली. जायते रस्ते उदका पोंदा गेले. हाचो परिणाम येरादारीचेरूय जालो. जायत्या गांवाचो संपर्क तुटलो. साळ-शापोरा पुल उदका पोंदा गेले. जायत्या घरांनी उदक भितर सरलें. दनपार म्हणसर दिवचले बाजारांतल्या दुकानांनी उदक भरलें.
दिवचलेचे आमदार डॉ. चंद्रकांत शेट्ये हांणी दिवचलचे परिस्थितीचो नियाळ घेतलो. उपजिल्लोधिकारी, मामलेदार हांचे सयत वेगवेगळ्या वाठारांची तांणी पळोवणी केली. तशेंच हुंवारात लुकसाण जाल्ल्या वाठारांक गरजेची मजत करपाचे आस्वासन तांणी दिलें. फुडाराक अशो घडणुको जावच्यो न्हय म्हणून गरजेचे उपाय करपाक उंचेल्या पांवड्यावेली बसका घेवन गरजेची तरतूद करपाक निश्चीत धोरणाची येवजण करपाची गरज आसा अशें स्पश्ट केलें.
मजगतीं, जिल्लोधिकारी स्नेहा गीते हांणी उपजिल्लोधिकारी कबीर शिरगांवकार हांचे सयत मयते- अस्नोड्यां भेट दिवन हुंवाराची पळोवणी केली.
कालच्यान पडपी पावसाक लागून राज्यांत घडिल्ल्या घडणुकांचेर एक नदर घालुया:
- नानोड्यां-दिवचले विद्यार्थ्यांक हाडपा खातीर गेल्ली बस हुंवाराच्या उदकांत आडकली.
- साळांतल्या भुमिका देवळाचो वाठार पावसाक लागून आयिल्ल्या हुंवाराच्या उदका पोंदा गेलो.
- मोपा विमानतळार वचपी रस्तो उदका पोंदाक गेल्ल्यान ताचो परिणाम येरादारीचेर जाला.
- वाळवंटी न्हंयेक हुंवार आयिल्ल्यान केरी-घोटेली पूल उदका पोंदा गेलो.
- दुदसागर न्हंयेच्या उदकाची पातळी वाडिल्ल्यान निरंकाल, तशेंच म्हादयची पातळी वाडिल्ल्यान गांजे-उसगांवचे रस्ते उदका पोंदा गेल्ल्यान येरादारीचेर परिणाम जाला.
- सावर्शें न्हंयेचें उदक रस्त्याचेर आयिल्ल्यान वाळपय-फोंडें रस्तो येरादारी खातीर तात्पुरतो बंद दवरला.
- कळणें न्हंयेंक हुंवार आयिल्ल्यान चांदेलचो रस्तो उदका पोंदा गेलो. हाचो येरादारीचेरूय परिणाम जाला. तशेंच चांदेलचो हेर गांवां कडेन संपर्क तुटला.
- खोर्ली-म्हापश्यांय घोग्यांनी पडपी पावसाक लागून हुंवार आयला. तशेंच कासारवर्णेय हुंवाराची स्थिती निर्माण जाल्या.
- शिरवय -जांबावले (कुडचडें) रस्तो उदका पोंदा गेल्ल्यान येरादारीचेर परिणाम जाला.
- कांदोळे दुकळे हॉस्पिटला लागसारच्या एका घराच्या कार पार्किंग शेडीचेर झाड पडून जालें लुकसाण.
२४ वरांत राज्यांत सरासरी ५.३३ इंच पावस
१ जून ते १ ऑगस्ट ह्या काळांत वाळपय १५१.५१ इंच पावसाची नोंद जाल्या. फाटल्या २४ वरांत राज्यांत सरासरी ५.३३ इंच पावसाची नोंद जाल्या. तशेंच केप्यां ७.८७ इंच पवासाची नोंद जाल्या. आतां मेरेन १२१.७१ इंच पावसाची नोंद जाल्या. सरासरी परस ५५.१ टक्के चड पावस पडिल्ल्याची हवामान खात्यान दिली म्हायती.
हवामान खात्याची शिटकावणी
हवामान खात्यान फुडलीं तीन वरां घोग्यांनी पावस पडपाची शक्यताय उक्तायल्या. वराक १५ मीमी परस चड प्रमाणांत वादळ वार्या सयत पावस पडपाची शिटकावणी खात्यान जारी केल्या.
गोंयां भायल्याय राज्यांनी पावसाचो सांवार
बिरेस्तारा सकाळीं भेडशी पुलाच्या जोड रस्त्यार हुंवार्या उदकांत आडकून उरिल्ल्या चोवग जाणांक दोडामार्ग पुलिसांनी वाटयले. भेडशी जोड रस्त्यार अचकीत उदक आयिल्ल्यान दोन चारचाकी गाडयो उदकांत आडल्ल्याची म्हायती पुलिसांक मेळ्ळी. पुलिसांनी घडणुके सुवातेर वचून आडकल्ल्यांक वाटयले. भेडशी दोडामार्ग हांगा उटंगाराच्या पावसाक लागून उदक रस्त्याचेर आयिल्ल्यान जायतीं वाहनां उदका पोंदा गेल्यांत.
तिळारी धरणाच्या वेवस्थापना कडल्यान आयिल्ले म्हायती प्रमाण, फाल्या २४ वरांनी तिळारी वट्ट २२१ मिमी पावसाची नोंद जाल्या. सध्या पावसाचेर सांवार आयिल्ल्यान न्हंयो, व्हाळ अश्या सुवातांचेर अचकीत उदकाचो विसर्ग वाडपाक शकता. गरज आसल्यारूच घरा भायर सरचे ना तर घरांतूच रावपाचो उलो तिळारीचे कार्यकारी अभियंते विनायक जाधव हांणी मारला. तशेंच तिळारी न्हंयेंतल्यान व्हांवपी उदकांतूय नेटान वाड जायत आसा. तिळारी न्हंय धोक्याची पातळी हुपपाची शक्यताय आसा. लोकांक सादूर रावपाची शिटकावणीय तांणी दिल्या.
संकश्टांत सांपडल्यार संपर्क करात!
उटंगाराच्या पावसाक लागून निर्माण जाल्ली आपत्कालीन स्थितींत मजती खातीर ०८३२-२४१९५५०/०८३२-२२२५३८३/०८३२-२७९४१०० ह्या क्रमांकाचेर संपर्क करपाचो उलो प्रशासनान मारला.
आयज पावसाक लागून घडिल्ल्या घडणुकांचे व्हिडियो ह्या लिंकांचेर क्लीक करून पळयात:
० केरी – सत्तरींतल्या घोटेली क्र. २ पुला वयल्यान व्हांवपी उदक.
० साळांतल्या भुमिका देवळाचो वाठार पावसाक लागून आयिल्ल्या हुंवाराच्या उदका पोंदा.
० उटंगाराच्या पावसाक लागून गुळेली- सत्तरी हांगा निर्माण जाल्ली हुंवाराची स्थिती.
० खोर्ले-म्हापश्यां व्हड पावसाक लागून हुंवाराची स्थिती निर्माण.
० केरी – सत्तरींतलो घोटेली क्र. २ पुल उदका पोंदा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
