भांगरभूंय | प्रतिनिधी
1 जानेवारी ते 31 मार्च 2024 मेरेनची आंकडेवारी
पणजी: गोंयांत 1 जानेवारी ते 31 मार्च 2024 मेरेन फाटल्या तीन म्हयन्यांत 426 जाणांनी भारतीय नागरिकत्व सोडलें. हातूंतल्या 418 जाणांनी पुर्तुगेझ नागरिकत्व स्विकारलां. तशेंच हेर 8 जाणांनी हेर देशांचें नागरिकत्व स्विकारलां. जाल्यार फक्त 89 जाण उत्तर गोंयांतले जाल्यार दक्षीण गोंयांतले 337 नागरिकांचो आस्पाव आसा. हातूंत सगल्यांत चड 232 जाण साश्ट म्हालांतल्या नागरिकांचो आस्पाव आसा. ही आंकडेवारी पळयतकूच दिसाक सरासरी 4 ते 5 नागरीक भारतीय नागरिकत्व सोडत आशिल्ल्याची धक्को दिवपी म्हायती मुखार आयल्या.
गोंयचेर पुर्तुगेझांचें 450 वर्सां राज्य आशिल्लें. 19 डिसेंबर 1961 वर्सा पुर्तुगेझां पसून गोंय मुक्त जालें. ताचे पयलीं जल्मल्ल्या खूबशा गोंयकारांची पुर्तुगालांत जल्म नोंदणी जाल्या. फक्त पुर्तुगालांत जल्म नोंदणीकृत आशिल्ल्यान तो पुर्तुगेझ नागरीक जायना. दुसऱ्या देशाचे नागरिकत्व मेळसर भारतीय पासपोर्ट रद्द करूंक मेळना. अशें आसतना खूबशे नागरीक पुर्तुगेझ नागरिकत्व मेळोवपा खातीर मुखार आसतात. ताका लागून गोंयचे चडशे नागरीक पुर्तुगेझ नागरिकत्व मेळ्ळे उपरांत भारतीय नागरिकत्वाचो त्याग करीत आशिल्ल्याचें मुखार आयलां.
भारतांत दोट्टी नागरिकत्वाचो कायदो नाशिल्ल्यान दुसऱ्या देशाचें नागरिकत्व स्विकारतनाच भारतीय नागरिकत्व सोडचें पडटा. फाटल्या कांय वर्सांत गोंयकारांचें प्रमाण वाडलां. चडशे लोक नोकरे खातीर विदेशांत वतात. थंयच्या सुविधांक लागून थंयच स्थायीक जातात. पूण गोंयांत पयलीं पुर्तुगेझ राज्य करीत आशिल्ल्यान खूबशे नागरीक पुर्तुगेझ नागरिकत्वाक प्राधान्य दितात. पुर्तुगेझ नागरिकत्व मेळिल्ल्यान युरोपियन देशांचो तांकां लाव मेळटा देखून खूबशे नागरीक भारतीय नागरिकत्व सोडपा फाटलें मुखेल कारण आसा.
नागरिकत्व सोडिल्ल्या 426 मदल्या 418 जाणांनी पुर्तुगेझ नागरिकत्व स्विकारलां. जाल्यार तीन कॅनडा, दोन युके जाल्यार दरेकी एकल्यान रशिया, पोलंड आनी जर्मनीचें नागरिकत्व स्विकारिल्ल्याची म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
