भांगरभूंय | प्रतिनिधी
इंडियन रोड काँग्रेसीचे बसकेचें उक्तावण
रोड कनेक्टिविटी सुदरावपाक मजत करपाचें केंद्रीय मंत्र्याचें उतर
बायपास रस्त्यांक मजत करपाची मुख्यमंत्र्यांची मागणी
भांगरभूंय । प्रतिनिधी
पणजी : गोंयांत 4 नव्या पुलांक मान्यताय दिवपाचो प्रस्ताव केंद्राच्या विचाराधीन आसून रोड कनेक्टिविटी सुदारपा खातीर पुराय मजत करपाचें आस्वासन केंद्रीय रस्ते येरादारी आनी म्हामार्ग राज्यमंत्री अजय तामता हांणी दिलें. इंडियन रोड काँग्रेसीच्या उक्तावणा वेळार ते उलयताले. बोरी पुलासयत बाणस्तारी तशेच मोले बायपास रस्त्याक भरीव मजत केंद्रान करची, अशी मागणी मुख्यमंत्री डॉ. प्रमोद सावंत हांणी केली.
पणजे इंडियन रोड काँग्रेसीचे बसकेचे बिरेस्तारा सांजे उक्तावण जालें. उक्तावणाक केंद्रीय रस्ते येरादारी आनी म्हामार्ग राज्यमंत्री अजय तामता, मुख्यमंत्री डॉ. प्रमोद सावंत, भौशीक बांदकाम खात्याचे मंत्री दिगंबर कामत आनी हेर अधिकारी हाजीर आशिल्ले.
सेल्फी पॉयंट (रोटेटिंग टॉवर) चो डीपीआर तयार जाले उपरांत ताचो वावर सुरू जाला. हे भायर गोंयांत 4 नव्या पुलांक मान्यताय दिवपाच्या प्रस्तावाचेर विचार चालू आसा. गोंयची लोकसंख्या 16 लाख आसली तरी 80 लाख पर्यटक गोंयाक भेट दिता. हो आंकडो फुडाराक देड कोटीचेर पावतलो. पर्यटकांचो आंकडो मतींत घेवन रोड कनेक्टिविटी तशेंच हेर सुविधा उबारपाक केंद्र सरकार गोंयाक मजत करतलें, अशें केंद्रीय मंत्री अजय तामता हांणी सांगलें. रोड इंजीनीरींग वाठारांत देशान एक नवो विक्रम केला. भारतांतले रस्ते पळोवन हेर देशांनी भारता सारके रस्ते तयार करपाक जाय, अशी आस्त केंद्रीय मंत्र्यान उक्तायली.
नव्या बोरी पुला सयत मोलें- खांडेपार लींक रस्तो, बाणस्तारी बायपास, सांखळी बायपास, वेस्टर्न बायपास हांकां केंद्रान भरीव मजत करची, अशी मागणी मुख्यमंत्री डॉ. सावंत हांणी केली. केंद्रांत नरेंद्र मोदी हांच्या फुडारपणा खाला भाजपाचें सरकार आयले उपरांत गोंया सयत पुराय देशांत रोड कनेक्टिविटींत सुदारणा जायत आसा. 2014- 15 ते 2025- 26 मेरेन गोंयांत 124 म्हामार्गांच्या कामांक मान्यताय दिल्या. ह्या म्हामार्गांचेर 15,860 कोटी रुपया खर्च जाल्यात. हे भायर रस्त्यांच्या 19 प्रकल्पांचेर 378 कोटी जाल्यार सीआरआयएफ प्रकल्पां खातीर 202 कोटी रुपया खर्च जाल्यात. गोंया खातीर केंद्रान 16,440 कोटींचो निधी दिला. हातूंतले 7,240 कोटी रुपया खर्च जाल्यात. गोंयांतल्या 280 किमि म्हामार्गां मदले 126 किमिच्या म्हामार्गाचें रुंदीकरण जालां. हेर 70 किमि म्हामार्गाचीं कामां चालू आसात, अशी म्हायती मुख्यमंत्र्यान दिली.
काँग्रेसीचें सरकार आसतना गोंयां सयत देशांत रोड कनेक्टिविटीची स्थिती बाबत आशिल्ली. मात भाजपाच्या डबल इंजीन सरकाराक लागून कंजेशनचें रुपांतरण कनेक्टिविटींत जालें, अशें मुख्यमंत्र्यान सांगलें.
भौशीक बांदकाम मंत्री दिगंबर कामत हांचें भाशण जालें. पर्वरी फ्लायओव्हराचें काम नेटान चालू आसून चवथी पयलीं फ्लायओव्हराचें उक्तावण जातलें. आडखळी आसून लेगीत कंत्राटदारांक फ्लायओव्हर कामाच्या दर्जांत कसलीच तडजोड करूंक ना, अशें कामत हांणी सांगलें.
बोरीचो जातलो अंत्रूज पूल
बोरी पुलाच्या कामाक मजत करपाची मागणी करतनाच ह्या पुलाचें नामकरण अंत्रुज पूल अशें करपाची घोशणा मुख्यमंत्री डॉ. प्रमोद सावंत हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
