भांगरभूंय | प्रतिनिधी
पणजीः हवामानाच्या वेगवेगळ्या कारणांक लागून 22 ते 25 एप्रील ह्या काळांत राज्यांत पावस पडपाची शक्यताय हवामान खात्यान उक्तायल्या. 23 ते 24 एप्रील ह्या काळांत पावसा वांगडाच उश्णताये खातीर येलो अर्लट जारी केला. जाल्यार 25 तारखेर फकत उश्णताये खातीर येलो अर्लट जारी केला. बुधवारा राज्यांत चडांत चड आनी उण्यांत उणें तापमान वाडिल्ल्यान उश्णताय आशिल्ली. फुडले स दीस राज्यांत चडांत चड तापमान 34 ते 36 अंश सेल्सियस मदीं उरपाची शक्यताय आसा.
बुधवारा पणजेंत चडांत चड तापमान 34.2 अंश आनी उण्यांत उणें तापमान 26.4 अंश नोंद जालां जाल्यार मुरगांवां चडांत चड तापमान 33.6 अंश आनी उण्यांत उणें तापमान 25.8 अंश नोंद जालां.
फुडले स दीस राज्यांतलें उण्यांत उणें तापमान 25 ते 26 अंश सेल्सियस मदीं उरतलें असो अदमास हवामान खात्यान उक्तायला. 26 ते 28 एप्रील ह्या काळांत राज्यांतलें हवामान सुकें उरपाची शक्यताय आसा. फाटल्या वर्सा मार्च आनी एप्रील म्हयन्यांत राज्यांत अवकाळी पावसाची नोंद जाल्ली. पूण अंदूं हे प्रमाम उणे आसा.
वाडत वचपी उश्णतायेचे फाटभुंयेर भलायकी खात्यान नागरिकांक जतनाय घेवपाचो उलो केलां. उश्णतायेचो धोको टाळपा खातीर वाताचे भायर सरप ना, सुती कपडे घालप, वता पसून राखण करप, घरांतलीं दारां आनी जनेलां उक्तीं दवरून हवा येता हाची खात्री करप, उदक पियेवप अश्यो सुचोवण्यो जारी केल्यात. नवजात, ल्हान भुरगीं आनी ज्येश्ठ नागरिकांची चड जतनाय घेवपाचो खात्यान उलो केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
