भांगरभूंय | प्रतिनिधी
विधानसभेंत डॉ. प्रमोद सावंत हांची लेखी जाप
पणजीः 1 जानेवारी 2020 ते 15 जून 2024 मेरेन राज्यांत 675 जिवघेणे अपघात जाल्यात. फक्त 6 प्रकरणांतल्या ड्रायव्हरांक राज्यांतल्या वेगळ्यावेगळ्या न्यायालयांनी ख्यास्त फर्मायल्या. 36 प्रकरणांतल्या वाहन चालकांक निरपराधी थारायल्यात. 645 जिवघेण्या अपघातांतले 30 वाहन चालक मेळूंक नाशिल्ले. तशेंच 45 जाणांचे वाहन परवाने स्थगीत केल्यात, विधानसभेंत मुख्यमंत्री डॉ. प्रमोद सावंत हांणी लेखी जाप दिली.
हे संबंदी मडगांवचे आमदार दिगंबर कामत हांणी तारांकीत लेखी प्रस्न दाखल केल्लो. ते प्रमाण 2020 वर्सा राज्यांतल्या वेगर्ळयावेगळ्या पुलीस स्टेशनांनी 125 गंभीर अपघात जाल्यात. 2021 वर्सा 121, 2022 वर्सा 174, 2023 वर्सा 158 आनी 2024 वर्सा 15 जून मेरेन 97 जिवघेणे अपघात जाले. 2020 वर्सा गंभीर अपघाताक लागून 9 जाणांचे वाहन चालक परवाने स्थगीत केल्ले. 2021 वर्सा 9, 2022 वर्सा 15, 2023 वर्सा 7 आनी 2024 वर्सा 5 जाणांक 15 जून मेरेन वाहन चालक परवानो स्थगीत केला.
वयल्या काळांत 30 वाहन चालक मेळूंक नाशिल्ले जे ह्या घातक अपघाताक जापसालदार आशिल्ले. ते प्रमाण 2020 वर्सा 6, 2021 आनी 2022 वर्सा दरेकीं 9, 2023 वर्सा 4 आनी 2024 वर्सा 2 जून 15 मेरेन मेळूंक नाशिल्ले.
मजगतीं, फाटल्या साडे चार वर्सांत राज्यांत 675 जिवघेणे अपघात जाल्यात. फक्त 6 प्रकरणांतल्या ड्रायव्हरांक राज्यांतल्या वेगळ्यावेगळ्या न्यायालयांनी ख्यास्त फर्मायल्या. 36 प्रकरणांतल्या वाहन चालकांक निरपराधी थारायल्यात. हाचे भायर राज्यांतल्या वेगळ्यावेगळ्या न्यायालयांनी 469 घातक अपघातांची सुनावणी प्रलंबीत आसात, अशी म्हायती लेखी जापेंत मुख्यमंत्र्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
