भांगरभूंय | प्रतिनिधी
केंद्र सरकाराची म्हायती : दरेका गोंयकारा फाटल्यान दोन मोबायल
भांगरभूंय, समीप नार्वेंकार ः गोंयांत स्मार्ट फोन वापरपी लोकांचो आंकडो २८.४५ लाखा मेरेन पावला. हाचो अर्थ सुमार १५ लाख लोकसंख्या आशिल्ल्या गोंयांत दरेका गोंयकारा फाटल्यान दोन मोबायल फोन आसात. ते भायर गोंयांत इंटरनेट वापरप्यांचो आंकडो २० लाखां परस चड आसा, अशी म्हायती केंद्रीय म्हायती तंत्रज्ञान मंत्रालयान दिल्या.
२०११ च्या जनगणने प्रमाण गोंयची लोक संख्या १५.७८ लाख इतली आसा. २०२१ सात नवी जनगणना जावंक ना. ती फुडें धुकल्ल्या. हो आंकडो मात्सो वाडला आसूं येत. मात १५ लाख लोकां कडेन वट्ट २८ लाखां परस चड मोबायल आसप ही एक अजापाची गजाल. कित्याक म्हटल्यार मार्चाच्या २०१४ पयली १५ लाख गोंयकारां कडेन फकत १.७१ लाख मोबायल आशिल्ले. आतां तांचो आंकडो ९ वर्सांनी वाडून डिसेंबर २०२३ त २८.४५ लाख इतलो पावला. ही मंत्रालयाची आकडेवारी.
मोबायलांक इंटरनेट आसतातूच. डिसेंबर २०२३ त गोंयांत फायबर इंटरेनट वापरपी लोकांचो आंकडो २०.९४ लाख मेरेन पावला. हातूंत घरगुती आनी ऑफीस कामांचो आस्पाव आसा. २०१४ पयलीं हो आंकडो फकत २.३१ लाख आशिल्लो. गोंयांत सप्टेंबर २०२३ मेरेन ५,४६३ किलोमिटर इंटरनेट सेवा दिवपी फायबर ऑप्टीक केबल घाल्यात, अशें मंत्रालयाचे आंकडे सांगतात.
गोंय सरकारान स्वताचें गोवा ब्राॅडबेंट नेटवर्क स्थापन केलां आनी हें गोंयच्या सगळ्या ग्रामपंचायतींनी ब्राॅडबँड इंटरनेट सेवा दिता. केंद्र सरकारान १.८८ लाख रुपया खर्चून भारत फायबर ही इंटरनेट सेवेची संकल्पना आखल्या. तातूंत गोंयचोय आस्पाव आसा. देशभरांतल्या ५५ गांवांनी ४ जी इंटरनेट सेवा मेळची म्हणून सरकारान ४१,३३१ कोटी रुपयांचे निधीक मंजुरी दिल्या. तातूंत गोंयच्या गावगिर्या वाठारांचोय आस्पाव आसा, अशें मंत्रालयान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
