भांगरभूंय | प्रतिनिधी
मंत्री नीळकंठ हळर्णकार हांची लेखी जाप
पणजी: गोंयांत 2019 ते मे 2024 अखेरेक हेडग्या गोरवांक लागून 73 अपघात जाले. हातूंत 13 मनशांक तेच बरोबर 10 जनावरांक मरण आयलें. पशुसंवर्धन मंत्री नीळकंठ हळर्णकार हांणी विधानसभेंत दिल्ले लेखी जापेंतल्यान ही म्हायती मेळ्ळ्या. ही म्हायती पुलीस खात्यान पशुसंवर्धन खात्याक दिल्या. हे विशीं आमदार रुडॉल्फ फर्नांडीस हांणी अतारांकीत प्रस्न उपस्थीत केल्लो.
जापेंतल्यान मेळिल्ले म्हायती प्रमाण वयल्या काळांत 2021 वर्सा 9 अपघातांत सगल्यांत चड 5 मनशांक आनी 6 जनावरांक मरण आयिल्लें. 2020 वर्सा 8 अपघातांत 4 मनशांक आनी 6 जनावरांक मरण आयिल्लें. 2019 वर्सा 17 अपघातांत 2 मनशांक आनी 3 जनावरांक मरण आयिल्लें. 2023 वर्सा 11 अपघातांत एक मनशाक मरण आयिल्लें. जाल्यार 2024 वर्सा 6 अपघात जाले. पूण एकाय मनशाक वा जनावराक मरण आयिल्लें ना.
पुलीस दळान पशुसंवर्धन खात्याच्या राज्यांतल्या हेडग्या गोरवांची सुवात कळयिल्ली. येरादारी पुलीस विभागान उत्तर गोंयांत 55 जाल्यार दक्षीण गोंयांत 91 सुवातांनी हेडगीं गोरवां रस्त्यार ठाण मांडून बसतात अशें कळयिल्लें. हे म्हायती प्रमाण फोंडें येरादारी क्षेत्रांत सगल्यांत चड 38 कडेन रस्त्यार गोरवां बसतात. वास्को 22, हणजूण्यां 20, काणकोणां 13, पणजे 9, म्हापशें आनी पर्वरे दरेकी 6 जाल्यार पेडण्यां 5 कडेन रस्त्यार गोरवांचो राबितो आसा.
हे विशीं उत्तर गोंय येरादारी पुलीस अधिक्षक राहूल गुप्ता हांणी 30 मे 2024 दिसा पशुसंवर्धन खात्याक पत्र धाडून ह्या सुवातांनी बसपी हेडग्या गोरवांक धरपाची विनंती केल्ली. हेडग्या गोरवांक लागून राज्यांतले रस्ते मरणाचे सांपळे जाल्यात आनी हाचेर कारवाय करप गरजेची आशिल्ल्याचें पत्रांत म्हणिल्लें. अशा जनावरांक चुकोवपाच्या नादांत वाहन चालकांचे अपघात जायत आशिल्ल्याचेंय पत्रांत नमूद केल्लें. तशेंच पणजी म्हानगरपालिके सयत राज्यांतल्या हेर 14 नगरपालिकांनी तांच्या क्षेत्रांत हेडग्या गोरवां खातीर विवीध उपाय येवजण्यो केल्यात.
2022 वर्सा सगल्यांत चड 22 अपघात
गोंयांत 2019 ते जून 2024 ह्या काळांत 2022 वर्सा हेडग्या गोरवांक लागून सगल्यांत चड 22 अपघातांची नोंद जाल्ली. हातूंत एका मनशाक मरण आयिल्लें. जाल्यार 4 जनावरांक मरण आयिल्ल्याचें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
