भांगरभूंय | प्रतिनिधी
पणजीः गोंयांत ५ जुनाक पावस पावलो तरी फाटले धा दीस पावस गायब आशिल्लो. पूण सोमारा सकाळीं पणजे आनी राज्यांतल्या हेर वाठारांनी पावस पडलो. पावसाक लागून कांय प्रमाणांत सुशेग मेळ्ळा.
गोंयांत २४ वरांत सरासरी ०.८१ इंच पावस पडला. ह्या हंगामांत आतां मेरेनचो हो दुसरो सगळ्यांत चड पावस. हाचे आदीं १० जून दिसा २४ वरांत ०.९७ इंच पावस पडिल्लो. हवामान खात्यान आयज आनी फाल्यां राज्यांत पावसाचो येलो अलर्ट जारी केला. २४ ते २७ जून ह्या काळांत मध्यम पावस पडपाची शक्यताय आसा.
पावसाक लागून राज्यांत चडांत चड आनी उण्यांत उणें तापमान देंवलां. पणजे चडांत चड ३१.५ अंश सेल्सियस आनी उण्यांत उणें २६.६ अंश सेल्सियस नोंद जालां. मुरगांवां चडांत चड तापमान ३३.६ अंश आनी उण्यांत उणें २५.२ अंश आशिल्लें. गोंयांत चडांत चड तापमान ३२ ते ३४ अंश सेल्सियस आनी फुडले स दीस उण्यांत उणें तापमान २६ ते २७ अंश सेल्सियस मदीं उरपाची शक्यताय आसा.
राज्यांत २४ वरांत काणकोणां २.२५ इंच आनी मडगांवां २.१८ इंच पावस पडला. राज्यांत १ ते २२ जून ह्या काळांत सरासरी ७.४४ इंच पावस पडला. ह्या काळांत चड करून २५.२५ इंच पावस पडटा. अंदूं राज्यांत पावस ७०.५ टक्क्यांनी उणो जाला. वयल्या काळांत काणकोणांत १८.४३ इंच, मुरगांवां ९.५२ इंच, मडगांवां ९.३५ इंच पावस पडला. अंदूं पावस उणो पडिल्ल्यान धरणांत उदकाचो सांठो उणो जायत आसा. उदकाचो उणाव जावचो न्हय हे खातीर सरकारान वेगवेगळे उपाय सुरू केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
