भांगरभूंय | प्रतिनिधी
मास्क घालपा सयत जतनाय घेवपाचें दोतोरांचें आवाहन
मडगांवां सगल्यांत चड 30 दुयेंती
पणजी : संवसार पाडव्या दिसा कोरोनाचे 23 नवे दुयेंती मेळिल्ल्यान सक्रीय दुयेंतींचो आंकडो 137 चेर पावला. देशा सयत गोंयांत कोवीड दुयेंतींचो आंकडो वाडत आसा. मडगांव, पणजे सयत राज्याच्या सगल्या भलायकी केंद्रांनी आतां कोविडाचे दुयेंती मेळ्ळ्यात. भिरांत बाळगुपा सारखी स्थिती नासली तरी जाणटे तशेंच दुयेंसां आशिल्ल्या लोकांनी जतनाय घेवपाचें आवाहन दोतोरांनी केलां.
देशांत कोवीड दुयेंती सयत एच 3 एन 2 इन्फ्लुएंझाचे दुयेंती वाडत आसात. प्रधानमंत्री नरेंद्र मोदी हांणी बुधवारा उंचेल्या पांवड्याची बसका घेवन स्थितीचो नियाळ घेतलो. हे बसकेक लागून केंद्रा कडल्यान राज्यांक खासा सुचोवण्यो वा निर्देश येवपाची शक्यताय आसा.
गोंयांत ल्हवू ल्हवू कोवीड दुयेंतींचो आंकडो वाडत आसा. बरे जावपी दुयेंती परस नवे दुयेंती मेळपाचें प्रमाण चड आसा. हाका लागून सक्रीय दुयेंतींचो आंकडो वाडत आसा. सक्रीय दुयेंतींचो आंकडो वाडून तो 137 चेर पावला. मडगांवां सगल्यांत चड 30 सक्रीय दुयेंती आसात. मडगांव उपरांत पणजेंत 11 दुयेंती आसात. म्हापश्यां 10, दिवचले आनी कुडचड्यार दरेकी 5, पेडण्यां 4 दुयेंती आसात. शिवोले 10, चिंबला 8, पर्वरे 4, वास्को 3 दुयेंती आसात. धारबांदोड्यां आनी हळदोण्यां दरेकी 3, पोरणें गोंय आनी खोर्ली दरेकी 2, कोलवाळे 6 दुयेंती आसात. कांसावले आनी फोंड्यां दरेकी 5 दुयेंती आसात. शिरोडें, कुठ्ठाळे, केपें, बेतकी, कांदोळे, मयें, काणकोण आनी सांखळे दरेकी 1 दुयेंती आसात. सगल्या भलायकी केंद्रांनी कोवीड दुयेंतींची नोंद जाल्या.
मार्चाचे सुरवेक सक्रीय दुयेंतींचो आंकडो 20 परस उणो आशिल्लो. आतां दर दिसा 15 ते 20 अशे दुयेंती मेळपाक लागिल्ल्यान सक्रीय दुयेंतींचो आंकडो 137 चेर पावला. बुधवारा 377 चांचण्यां उपरांत 23 दुयेंती मेळ्ळे. फक्त 11 दुयेंती बरे जाले.
मास्क घालपा सयत जतनाय
घेवपाचें दोतोरांचें आवाहन
ओमिक्रोन विशाणूक लागून कोवीड दुयेंती मेळपाक लागल्यात. भलायकी खातें दर दिसा स्थितीचो नियाळ घेता. सगल्या केंद्रांनी दुयेंती आसात अशें भलायकी संचालक डॉ. गीता काकोडकार हांणी सांगलें. सगल्यांनी मास्क घालपा सयत जतनाय घेवपाची गरज आसा. भिरांत बाळगुपाची गरज नासली तरी खासा करून जाणटेले तशेंच दुयेंसां आशिल्ल्या लोकांनी चड जतनाय घेवपाक जाय. मास्क घालपा सयत गरम उदक पियेत जाल्यार कोविडाचो संसर्ग जावपाची शक्यताय उणी आसा. कोविडाचीं लक्षणां दिसत जाल्यार भलायकी केंद्रांत वचून चांचणी करची. कोवीड जालो जाल्यार उपचार सुरू करचे. हेर राज्यांनी कोविडाचे दुयेंती वाडपा सयत कांय दुयेंतींक मरण आयलां. हाका लागून जतनाय घेवप योग्य थारतलें अशें तांणी सांगलें.
गोंयांत 90 टक्क्यां परस चड लोकांनी वासीन घेतलां. वासिनां सध्या उपलब्ध नात. हाका लागून वासिनिकरण मोहीम बंद आसा. भलायकी खात्यान केंद्रा कडेन वासिनांची मागणी केल्ली. वासिनां उपलब्ध नाशिल्ल्यान आतां वासिनां मेळूंक शकना अशें डॉ. गीता काकोडकार हांणी सांगलें
एच 3 एन 2 इन्फ्लुएंझाचे दुयेंतीं बरे जाले
गोंयांत एच 3 एन 2 इन्फ्लुएंझाचे दोन दुयेंती मेळिल्ले. दोनूय दुयेंती आतां बरे जाल्यात. एच 3 एन 2 इन्फ्लुएंझा स्थितीचो दर दिसा भलायकी खातें नियाळ घेता. गोंयांत आतां एच 3 एन 2 इन्फ्लुएंझाची चांचणी सुरू जाल्या अशी म्हायती भलायकी संचालक डॉ. गीता काकोडकार हांणी दिली.
हॉस्पिटल कर्मचाऱ्यांक कोविडाची लागण
हॉस्पिटलांतल्या कर्मचाऱ्यांक लेगीत आतां कोविडाची लागण जावपाक लागल्या. हाका लागून कोवीड परतून वाडपाक लागला अशें कोवीड तज्ञ समितीचे वांगडी डॉ. शेखर साळकार हांणी सांगलें. खासगी हॉस्पिटलांनी आतां कोविडाचेर उपचार करपाची सुविधा ना. म्हजे कडेन आयिल्ल्या दुयेंतींक हांवें गोंय वैजकी म्हाविद्यालय हॉस्पिटलांत धाडले. दर एकल्यान मास्क घालपा सयत जतनाय घेवप योग्य थारतलें अशें तांणी सांगलें.
प्रधानमंत्र्यांनी घेतली बसका
देशांत कोविडाचे दुयेंती वाडत आसात. प्रधानमंत्री नरेंद्र मोदी हांणी उंचेल्या पांवड्याचेर बसका घेवन कोवीड स्थितीचो नियाळ घेतलो. देशांत 1134 नवे दुयेंती मेळिल्ल्यान सक्रीय दुयेंतींचो आंकडो 7026 चेर पावला. देशांत 5 दुयेंतींक मरण आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
