भांगरभूंय | प्रतिनिधी
‘देवरा’ ह्या चित्रपटाचें शुटींग गोंयच्या अगम्य वाठारांत
पणजी : नामनेचो चित्रपट अभिनेतो ज्यू, एनटीआरच्या ‘देवरा’ ह्या चित्रपटाचें शुटींग गोंयच्या अगम्य अश्या वाठारांत सुरू जाल्या. ह्या शेड्यूल मजगतीं चित्रपटांतले कांय म्हत्वाचे भाग शूट करतले. मुखार आयिल्ले म्हायती प्रमाण, सध्या हे शुटींगेंत एनटीआर सयत चित्रपटांतल्या मुखेल कलाकारांचोय आसपाव आसतलो. तशेंच येवपी सप्तकाच्या निमाणें मेरेन ह्या चित्रपटाचो शेड्यूल हालयला.
‘देवरा’ ह्या चित्रपटांत जान्हवी कपूर फिमेल लिड आसा. जाल्यार सैफ अली खान हो व्हिलनाचे भुमिकेंत आसा. चित्रपट दोन भागांनी प्रदर्शीत जातलो. एनटीआर आर्ट्स आनी युवा सुधा आर्ट्स हे देवराचे निर्माते आसात.
मजगतीं सगळ्यांचे दोळे आनी कान हे अनिरुद्धच्या वर्ल्ड क्लास संगीताचेर तिगून आसात. ‘देवरा’ १० ऑक्टोबराक सगळ्या भारतीय भासांनी प्रदर्शीत जातलो.
देवराचें शुटींग सोंपल्या उपरांत एनटीआर हृतिक रोशन हांचे सयत ‘वॉर २’ खातीर शुटींग सुरू करतलें. हो चित्रपट ऑगस्ट २०२५ त रिलीज जातलो. अयान मुखर्जी हे ह्या चित्रपटाचे दिग्दर्शक आशिल्ल्यान यशराज फिल्म्स निर्माते आसात. एनटीआर आनी प्रशांत नील हांचो आनीक एक चित्रपट प्रकल्प ह्या वर्साचे निमाणे कडेन सुरू जातलो.
मजगतीं, २००४ सावन गोंयांत आंतरराष्ट्रीय चित्रपट महोत्सवाची सुरुवात जाले उपरांत गोंयांत खुबश्यो मालिका चित्रपट आनी शॉर्ट फिल्म्स शूट केल्यात. हातूंत बॉलीवूड, टॉलीवूड, सँडलवूड, मॉलीवूड आनी हेर प्रादेशीक चित्रपटांचे चित्रीकरण जालें.
गोंयांत आयज मेरेन बॉम्बे टू गोवा, जोश, दिल चाहता है, गोलमाल, गो गोवा गोन, सिंघम, सिंबा, दृश्यम, डिअर जिंदगी, मडगांव एक्सप्रेस अश्या फामाद चित्रपटांचें शुटींग जालां. गोंय सरकारने सिंगल विंडो ऑपरेशन्स सुरू केल्ल्याक गोंयांत मालिका, वेब सिरिज, लघुपट आनी हेर खुबश्या शुटींगांत वाड जाल्या.
गोंयांत शुटींग जावपी चित्रपटांक लागून गोंयच्या कलाकारांक ,ज्युनियर आर्टिस्ट, स्पॉट आनी डिओपी, कॉस्टयूम डिजायनर तशेंच मेकअप आर्टिस्ट आनी केटरिंग स्टाफ हांगाय रोजगार मेळटा. तशेंच गोंयचे खुबशे तरणाटे, अणभवी दिग्दर्शक, तांत्रीक सल्लागार, डिओपी तशेंच कलाकारांच्या हाता खाला काम करून अणभव घेतात. हातूंत पर्यटन आनी हेर घटकांचो फायदोय जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
