भांगरभूंय | प्रतिनिधी
भुंयगत वीज वाहिन्यां खातीर राज्याक निधी मेळोवन दितलों
पणजी : गोंय हें संवसारीक मळार म्हत्वाचें पर्यटन थळ आसा. रोजगार निर्मिती खातीर राज्यांत नवे उद्देग सुरू जावपाची गरज आसा. गोंय विजेंत स्वयंपूर्ण जावपा खातीर वीज निर्मिती प्रकल्प सुरू करपाचें यत्न आसतले, अशें केंद्रीय उर्जा राज्यमंत्री श्रीपाद नायक हांणी सांगलें.
उत्तर गोंयचे खासदार श्रीपाद नायक हांणी राज्यमंत्री म्हूण आयतारा सोपूत घेतलो. पयलेच खेपे तांकां उर्जा खातें मेळ्ळां. खात्याचो पदभार घेतले उपरांत मंगळारा तांणी अधिकाऱ्यां सयत बसका घेवन खात्याची म्हायती घेतली.
पुराय देशांतली विजेची स्थिती कशी आसा, हे विशीं सोमारा हांवें म्हायती घेतली. खंयची येवजण वा बदल करचे पयलीं खात्याचो अभ्यास करचो पडटा. खात्याचो अभ्यास करून योग्य वेळार हांव निर्णय घेतलों, अशें तांणी सांगलें.
गोंयाक 850 मेगावॉट वीज लागता. गोंयांत वीज निर्मिती जायना. हाका लागून हेर राज्यांतल्यान विजेची खरेदी करची पडटा. वीज खरेदीचेर बरोच खर्च जाता. राज्यात वीज निर्मिती जावची म्हूण एखादो प्रकल्प सुरू करपाक म्हजें प्राधान्य आसतलें. मात राज्य सरकारा कडल्यान प्रतिसाद मेळपाक जाय. एखादो प्रकल्प जाय, अशी राज्यांतल्यान मागणी जाली जाल्यार ती मागणी फुडें व्हरप सोंपे जाता, अशें तांणी सांगलें.
कोळशाचेर आधारीत वीज निर्मिती प्रकल्पांक सगल्याक विरोध जाता. हाका लागून उदकाचेर वा वाऱ्याचेर आदारीत वीज निर्मिती प्रकल्प उबारपाचो विचार जावपाक जाय. गोंयाक कसलो वीज निर्मिती प्रकल्प योग्य आसा, ताचो विचार करून पावलां उखलतलों, अशें तांणी सांगलें.
उद्देगां खातीर वीज उपलब्ध करून दिवपाची जापसालदारकी सरकाराची आसता. हाका लागून गोंंयांंत वीज निर्मिंती प्रकल्प जालो जाल्यार उद्देगांक लावकारी थारतलें.
तमनार प्रकल्पाच्या कामाचो नियाळ घेतलों
तमनार प्रकल्पाच्या सध्याचे स्थिती विशीं म्हाका म्हायती ना. प्रकल्पाची म्हायती घेवन हांंव फांटपुरवण करतलों. प्रकल्पाचें काम कितलें पुराय जालांं, कित्याक लागून काम प्रलंंबीत आसा, ताची म्हायती पयलीं घेवची पडटली. तमनार प्रकल्पाचेर हांंव बसका घेतलों. तमनार प्रकल्प हो गोंंय आनी कर्नाटक ह्या दोन राज्यां मदलो प्रकल्प आसा. हाचे खातीर जोड बसका घेवची पडटली, अशें श्रीपाद नायक हांणी सांंगलें.
भुंयगत वीज वाहिन्यां खातीर निधी
गोंयांत भुंयगत वीज वाहिन्यांचे काम सगल्याक सुरू आसा. 33 केव्ही वीज वाहिन्यो भुंयगत करपाचो वावर सगल्याक सुरू आसा. 33 केव्ही वाहिन्यो (लायनी) भुंयगत जाले उपरांत 11 केव्ही वीज वाहिन्यो भुंयगत जातल्यो. हाचे खातीर व्हड प्रमाणांत निधीची गर आसा. राज्याक निधी उपलब्ध करून दिवपाक म्हजें प्राधान्य आसतलें अशें श्रीपाद नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
