गोंयांत वाडटा डायलिसीस दुयेंतींचो आंकडो ः मुख्यमंत्री

भांगरभूंय | प्रतिनिधी

पणजी, बातमीदार ः हांव सदांच म्हणटां भियेवपाची गरज ना. पूण गोंयांत वाडत वचपी डायलिसीस दुयेंतींचो आंकडो पळयल्यार भियेवपाची गरज आसा. राज्यांत दर दिसा एक ते दोन नवें डायलिसीस दुयेंती मेळपाक लागल्यात. ही गजाल भियेवपाची आसा अशें मत मुख्यमंत्री डॉ. प्रमोद सावंत हांणी उक्तायलें. शुक्रारा मारियो सिकेरा हांणी बरयिल्ल्या ‘रोड मॅप टू लाँजीटीव्हीटी’ ह्या पुस्तकाच्या प्रकाशन सुवाळ्यांत ते उलयताले. ह्या वेळार पर्यावरण मंत्री अॅलेक्स सिक्वेरा, प्रकाशक शंतनू रे चौधरी हाजीर आशिल्ले.

मुख्यमंत्र्यान सांगलें, वीस ते पंचवीस वर्सां आदीं राज्यांत जीएमसींत एकूच डायलिसीस केंद्र आशिल्लें. त्या वेळार डायलिसीसची गरज आशिल्ल्या दुयेंतींचोय आंकडो उणो आशिल्लो. पूण, फाटल्या कांय वर्सांत हो आंकडो नेटान वाडत आसा. आयज राज्यांतल्या बाराय तालुक्यांनी डायलिसीस केंद्रां आसात. तरी लेगीत दुयेंतींक नंबर घेवन रावचे पडटात. आपल्या दुयेंतीचें बेगीन डायलिसीस करपाची विनवणी लोक म्हाका करतात.
मुखार तांणी सांगलें, आमकां आहाराचेर नियंत्रण दवरपाची गरज आसा. कितें खावचें, कितें खावचें न्हय, कितलें खावचें, केन्ना खावचें हें आमकां कळप गरजेचें. योग्य आहारा वांगडाच व्यायाम आनी योग करप गरजेचें आसा. कांय दिसां आदीं हांवें स्वातंत्र्य सैनिक लिबिया लोबो सरदेसाय हांची भेट घेतिल्ली. तांणी आतांच पिरायेचीं 100 वर्सां पुराय केल्यांत. ताणी आपले भलायकेची बरी जतनाय घेतल्या.

म्हाका 100 वर्सां जगपाची इत्सा आसा
चड काळ जियेवप आनी तेच बरोबर भलायकेन बरे आसप म्हत्वाचें अशें मुख्यमंत्री डॉ. सावंत हांणी सांगलें. म्हाका 100 वर्सां मेरेन जगपाची इत्सा आसा. हाजीर आशिल्ल्या कांय जाणांची जर अशी इत्सा आसा जाल्यार तांणी आयच्यान योग करपाक सुरवात करची.
गोंयच्या गांवगिऱ्या वाठारांनी शंबर वर्सां जगिल्ले लोक आसात. योग्य आहाराक लागून हें शक्य जाता. शारिरीक व्यायामा वांगडाच मानसीक भलायकी सांबाळप लेगीत म्हत्वाचें. मानसीक भलायकी बरी ना जाल्यार ताण वाडटा. हाका लागून गोडेंमूत, काळजाचे दुयेंस, दम्या सारकिल्लीं दुयेंसां जावपाक लागल्यांत. पूण योग्य व्यायाम आनी मानसीक भलायकी बरी आसल्यार तें टाळूं येता अशेंय मुख्यमंत्र्यान सांगलें.