भांगरभूंय | प्रतिनिधी
पणजी, प्रतिनिधी: गोंयांत नोकर्यो मेळप कठीण जालां. देखून गोंयान तंत्रगिन्यान विकसीत करपाचेर भर दिवचो. जाका लागून तरणाट्यांक रोजगाराची संद निर्माण जातली आनी ते भायर गोंयची अर्थीक उदरगतूय जातली, अशें आदले केंद्रीय मंत्री सुरेश प्रभू हांणी सांगलें. तशेंच आर्टीफिशीयल इंटेलिजेन्साचेर चड निंबून रावनाकात असोय सल्लो तांणी दिलो.
कला अकदामी पणजे व्हायब्रंट गोंयचे संवसारीक तंत्रगिन्यान परिशदेचें सुरेश प्रभू हांचे हस्तुकीं उक्तावण जालें. ह्या वेळार ते उलयताले. तांणी फुडें म्हणलें, गोंया कडेन निर्मिती तांक आसा आनी गोंयान तातूंत लक्ष दिवपाची गरज आसा. सध्या तंत्रगिन्यान ही नवी संकल्पना आनी नवी निर्मिती. गोंयांत तंत्रगिन्यान व्हडा प्रमाणांत विकसीत करूं येता. पर्यटना वांगडा तंत्रगिन्यानूय गोंयची वळख जावन रावची.
आर्टीफीशीयल इन्टेलिजेन्स (एआय) ही एक संद, तशेंच एके तरेचें संकश्टूय जावन आसा. एआय मनशाचीं कामां करूंक लागिल्ल्यान फुडाराक नवीं आव्हानां मुखार येवपाक शकतात. देखून तांकां तोंड दिवपाक आमचे कडेन बळगें आसतलें काय हाचो विचार आमी पयलीं करपाक जाय. एआय कडेन बुद्धिमत्ता आसा खरी, मात ती बुदवंत न्हय. बुदवंतकाय फकत मनशा कडेन आसा देखून एआयचो वापर बर्या कामा खातीर जावचो ताचो दुरूपेग करचो न्हय असो उलो प्रभू हांणी मारलो.
गोंयां सयत केंद्रांतूय श्रीपाद भाऊ लोकप्रीयः प्रभू
केंद्रीय मंत्री श्रीपाद नायक गोंयांत लोकप्रीय आसातूच. मात केंद्रांतले मंत्री म्हणूनय तांणी नामनां मेळयल्या. आर्दश घेवपा सारके ते फुडारी जावन आसात. श्रीपाद भाऊ परत एक फावट खासदार म्हूण वेंचून येतले आनी तांच्या हातांतल्यान बरें काम घडटलें. फुडाराक तांचेर चड जबाबदार्यो येतल्यो, अशें आदले केंद्रीय मंत्री सुरेश प्रभू हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
