भांगरभूंय | प्रतिनिधी
हवामान खात्याची अधिकृत घोशणा
पणजी: मंगळारा मॉन्सून पावसान गोंयांत हाजेरी लायली. हवामान खात्यान हे विशींची अधिकृत घोशणा केली. सांजवेळा 6.30 मेरेन पणजेंत 2.44 इंच पावसाची नोंद जाली. जाल्यार मडगांवां 0.45 इंच पावसाची नोंद जाली. हवामान खात्यान 6 ते 8 जून मजगतीं वादळी वाऱ्या सयत पावसाची शक्यताय उक्तायल्या. ते प्रमाण ह्या तीन दिसां खातीर यलो अलर्ट जारी केला.
मंगळारा सकाळीं 8.30 उपरांत पणजे सयत राज्यांतल्या हेर वाठारांनी पावसाक सुरवात जाली. पावसान सुमार वरभर पणजेंत धुमशेण कांडलें. शारांतल्या खूबशा रस्त्यांचेर उदक सांचिल्लें. उपरांत पावसान विसव घेतलो. दीसभर वत पावसाचो खेळ सुरूच आशिल्लो. 1 जून ते 4 जून मजगतीं गोंयांत सरासरी 13.7 मिमि पावसाची नोंद जाल्या. पावसांत 69.1 टक्क्यांची तूट आसा.
मंगळारा पावस पडलो तरी गोंयांतलें चडांत चड तापमान चडेच आशिल्लें. पणजेंत चडांत चड 34.7 अंश जाल्यार मुरगांवां 33.8 अंश सेल्सीयस तापमानाची नोंद जाली. फुडले स दीस राज्यांतलें चडांत चड तापमान 32 ते 33 अंश जाल्यार उण्यांत उणें तापमान 25 ते 27 अंश सेल्सीयस मजगतीं उरपाची शक्यताय खात्यान उक्तायल्या. 5 ते 7 जून मजगतीं वाऱ्याचो वेग वराक 35 ते 65 किमि मेरेन पावपाची शक्यताय आशिल्ल्यान नुस्तेमारांनी दर्यांत वच्चें न्हय अशें आवाहन खात्यान केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
