गोंयांत पेत्रोलान ‘शंबरी’ हुपली

भांगरभूंय | प्रतिनिधी

सप्तका भितर दुसरे खेपे इधनाच्या दरांनी वाड

पणजीः भारतांत सप्तका भितर दुसरे खेपे इधनाच्या दरांत वाड जाल्या. पेत्रोल, डिझेल दर लिटर 90 पयशांनी म्हारग जाले. हाचो परिणाम गोंयांतूय जाला. गोंयांत पेत्रोलान शंबराचो आंकडो हुपलो. हाचे आदीं 15 मेक पेत्रोल आनी डिझेलाचे दर 3 रुपयांनी वाडिल्लें.
नव्या दरां प्रमाण गोंयांत पेट्रोल 100.40 रुपया आनी डिझेल 92.17 रुपया दर लिटराक विकतात. जाल्यार आतां प्रीमियम ग्रेड स्पीड पेट्रोला खातीर दर लिटराक 109.29 रुपया फारीक करचे पडटा.
सप्तकांत सेगीत दुसरे खेपे इंधनाचे दर वाडिल्ल्यान सामान्य लोक, वाहन चालक आनी म्हाल येरादारी मळार अर्थीक ताण वाडपाची शक्यताय आसा. इंधनाचे दर वाडिल्ल्यान ताचो येरादारी खर्चाचेर परिणाम जातलो आनी दिसपट्ट्या वस्तूंचे दर वाडपाची शक्याताय आसा.

हेर शारां परस गोंयांत दर उणे
पेट्रोलाचे दर वाडले तरी हेर शारां परस गोंयांत पेट्रोलाचे दर उणे आसात. वाड जाले उपरांत पुण्यांत पेट्रोल 106.98 रुपया, मुंबयंत 107.60 रुपया, बेंगळुरूंत 107.10 रुपया आनी हैदराबादांत 110.89 रुपया आसा.

तशेंच हेर शारांपरस डिझेलूय गोंयांतय मात्शें सवाय आसा. दर वाडल्या उपरांत गोंयांत डिझेलाचे दर 92.17 रुपयाचेर पावल्यात. मुंबयंत डिझेल 94.08 रुपया, पुण्यांत 94.39, बेंगळुरूंत 95.04 रुपया आसा.