गोंयांत पावसाचें प्रमाण उणें

भांगरभूंय | प्रतिनिधी

पूण वादळी वाऱ्याक लागून कांय सुवातांनी झाडां पडून लुकसाण

पणजी: सोमारा गोंयांत पावसाचें प्रमाण उणें आशिल्लें. पूण वादळी वाऱ्याक लागून कांय सुवातांनी झाडां पडून लुकसाण मात जालें. गोंयांत 7 ते 9 जुलय मजगतीं मध्यम ते उटंगाराचो पावस पडपाची शक्यताय आसा. तेप्रमाण ह्या तीन दिसां खातीर पावसाचो यलो अलर्ट जारी केला. जाल्यार 10 ते 12 जुलय मजगतीं मध्यम स्वरुपाच्या पावसाची शक्यताय आसा. गोंयांत 1 जून ते 33.26 इंच पावसाची नोंद जाल्या. अंदूं पावसाचें प्रमाण 25 टक्क्यांनी उणें आसा.

हाचे आदीं हवामान खात्यान गोंयांत जुलय म्हयन्यांत सरासरी परस उण्या पावसाची शक्यताय उक्तायिल्ली. सोमारा गोंयांत अदीं मदीं पावसाच्यो नेटाच्यो दडको पडटाल्यो. ह्या वेळार पावस आनी वाऱ्याक लागून झाडां पडपाच्यो घडणुको घडल्यो.

24 वरांत गोंयांत 1.25 इंच पावसाची नोंद जाली. धारबांदोड्यां 3.07 इंच, फोंड्यां 2.75 इंच, सांग्यार 1.77 इंच, वाळपय 1.34 इंच पावसाची नोंद जाली.

गोंयांत 1 जून ते 6 जुलय मजगतीं काणकोणां सगल्यांत चड 48.19 इंच पावसाची नोंद जाली. धारबांदोड्यां 39.47 इंच, मडगांवां 38.92, सांग्यार 34.29 इंच, फोंड्यां 34.13 इंच, वाळपय 34.08 इंच पावसाची नोंद जाली. पावसाक लागून धरणांतल्या उदकाच्या सांठ्यांत वाड जायत आसा.

6 जुलय अखेरेक गावणें धरणांत 67 टक्के, आमठाणें धरणांत 65 टक्के, चापोली धरणांत 53 टक्के , साळावली धरणांत 40 टक्के, तिलारी धरणांत 39 टक्के, पंचवाडी धरणांत 35 टक्के जाल्यार अंजूणें धरणांत 19 टक्के उदकाचो सांठो शिल्लक आशिल्लो.