भांगरभूंय | प्रतिनिधी
भांगरभूंय। खबरां मेज
पणजीः गोंय म्हायती तंत्रगिन्यान, इलेक्ट्रॉनिक्स आनी जनसंपर्क खाते, इन्फिनिटी ऍक्स स्टेम फांवडेशनाच्या जोड पालवान 25 तें 28 जानेवारी 2024 मगगजीं गोंयांत आंतरराष्ट्रीय रोबोटिक्स महोत्सव जातलो. तातूंत प्रतिश्ठेची फर्स्ट टॅक चलेंज इंडिया रोबोटिक्स, फर्स्ट लेगो लीग ओपन आनी फर्स्ट टॅक चलेंज (एफटीसी) रोबोटिक्स सर्ती तशेंच रोबोटिक्स प्रदर्शन जातलें.
म्हायती आनी तंत्रगिन्यान मंत्री रोहन खवंटे, म्हायती तंत्रगिन्यान खात्याचो संचालक पी अभिषेकी आनी इन्फिनिटी ऍक्स स्टेम फावंडेशन आनी फर्स्ट इंडियाचे अध्यक्ष आनी वेवस्थापकीय संचालक आश्वीन बी सावंत हांणी हे संबंदीत समजिकायेचे कबलातीचेर सयो केल्यो. तरणाटे पिळगे मदीं विज्ञान आनी तंत्रगिन्यान हाची आवड तयार करपा खातीर ह्यो रोबोटिक्स महोत्सवाचो उपेग जातलो.
गोंयांत आंतरराष्ट्रीय रोबोटिक्स महोत्सव आयोजीत केल्ल्यान शिक्षणीक आनी वैयक्तीक वाड जावपाक मजत जातली. ताचे वरवीं विद्यार्थ्यां मदीं आत्मविस्वास आनी म्हत्वाची कुशळटाय वाडपाक मजत जातली अशें रोहन खवंटेन सांगलें. एफटीसी रोबोटिक्स सर्ती व्हो महोत्सवाचो एक म्हत्वाचो वांटो आसतलो. अभियांत्रिकी तत्वांचेर आदारीत धोरणात्मक रोबोट उदरगत ही विज्ञानीक सर्त आनी तंत्रगिन्याना सयत खेळाच्या उदरगतीक पुरक थारतलो अशेंय ताणे सांगलें.
भारतीय विद्यार्थ्यां मदीं विज्ञान, तंत्रगिन्यान, गणित शिक्षणाक उर्बां दिवपाचें काम आंतरराष्ट्रीय रोबोटिक्स महोत्सवा वरवीं जातलें अशें आश्वीन सावंत हाणे सांगलें. महोत्सवांतल्या सर्तींतलें वैशिश्ट्य म्हणल्यार ह्युस्टन आनी टेक्सास (अमेरिका) हागां जावपी संवसारीक सर्तींत भारताचें प्रतिनिधीत्व करपी पंगड वेचून काडटले. शिवाय सिडनी- ऑस्ट्रेलिया हांगा जावपी आशिया पॅसिफीक सर्तींत भारतांतल्या धा पंगडांक देशाचें प्रतिनिधीत्व करपाची संद मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
