गोंयांत जातलें नवें क्रूझ टर्मिनल

भांगरभूंय | प्रतिनिधी

पणजी ः गोंयच्या मुरगांव बंदर प्राधिकरणान मार्च 2025 मेरेन गोंयांत आंतरराष्ट्रीय आनी देशी प्रवासी टर्मिनल बांदपाची घोशणा केल्या. 2023- 24 वर्सा क्रूझ प्रवाशांचो आंकडो 40 टक्क्यांनी वाडपाची शक्यताय आसा. आंतरराष्ट्रीय आनी देशी क्रूझ टर्मिनल आनी संबंदीत सुविधांच्या विकासाक लागून पर्यटन तशेंच थळाव्या अर्थवेवस्थेक चालना मेळटली अशें एमपीएच्या एका वरिश्ठ अधिकाऱ्यान सांगलें.
12 आनी 13 सप्टेंबराक गोंयांत जाल्ले सागरी राज्य विकास परिशदेच्या बसकेंत एमपीएच्या एका अधिकाऱ्यान सांगलें, संवसारीक क्रूझ जहाज येरादारींत उदरगत जाल्ल्यान मुरगांव बंदराचेर क्रूझ बोटींचो आंकडो नेटान वाडला आनी फुडाराकय तांतूत व्हड वाड जावपाची शक्यताय आसा. केंद्रीय मंत्री सर्बानंद सोनोवाल हांणी हे बसकेंत प्रस्तावीत अत्याधुनीक इमारती भेट दिली. हे इमारतींत आंतरराष्ट्रीय आनी देशी क्रूझ टर्मिनल आसतले. अधिकाऱ्यांन सांगलें, हांगा प्रवाशांची खाशेली जतनाय घेतात. ह्या आंतरराष्ट्रीय क्रूझ टर्मिनलांत 24 इमिग्रेशन काउंटर, 10 चेक इन काउंटर, वेटिंग लाऊंज, ड्यूटी फ्री रिटेल शॉप, लाऊंज, फूड कोर्ट आनी हेर सुविधा आसतल्यो.
कोरोनाक लागून हांगाच्या पर्यटन उद्देगात समस्या निर्माण जाली. पर्यटकांचो आंकडो 90 टक्क्यां परस चड उणो नोंद जालो. हाचे उपरांत गोंय सरकाराच्या पर्यटन खात्यान कोविड-19 म्हामारीचेर मात करपा खातीर ‘आंतरराष्ट्रीय चार्टर सहाय्य’, ‘पर्यटन वेपार सहाय्य’ अशो जायत्यो येवजण्यो सुरू केल्यो. 2022-23 वर्साचे तुळेंत 2023-24 वर्सा क्रूझ बोटींचो आंकडो 15 टक्के आनी क्रूझ प्रवाशांचो आंकडो 40 टक्के वाडला.
पर्यटन हो गोंयचे अर्थवेवस्थेचो मुखेल आदार. अहवाला प्रमाण भारतांत येवपी वट्ट पर्यटकांतल्या सुमार 20 टक्के पर्यटकांची गोंय ही पयली निवड. सरकारी आंकडेवारी प्रमाण जानेवारी-नोव्हेंबर 2023 वर्सा 4.03 लाख विदेशी पर्यटक गोंयांत आयिल्ले. त्याच वेळार गोंय सरकाराच्या पर्यटन खात्याच्या म्हणण्या प्रमाण 2019 वर्सा सुमार 71 लाख देशी पर्यटक आनी सुमार 10 लाख परकी पर्यटक गोंयांत आयिल्ले. फाटलीं 4 वर्सां गोंयच्या पर्यटन उद्देगांत देशी आनी विदेशी भोंवडेकारांचो आंकडो नेटान वाडला. ताका लागून क्रूझ टर्मिनल बांदपाचेर भर दिला आनी ते फुडल्या वर्सा पुराय जातलें.