भांगरभूंय | प्रतिनिधी
गोंय सरकाराची टाटा मेमोरियला कडेन समजिकाय कबलात
भांगरभूंय । प्रतिनिधी
पणजी : कांक्र, गोडेंमूत ह्या सारक्या दुर्धर दुयेंसांचीं कारणां आनी एकंदर प्रमाण हांचो अभ्यास (कोहोर्ट स्टडी) तशेंच संशोधन करपाचो वावर आतां सुरू जाला. ह्या संशोधना उपरांत भलायकी धोरण आंखपा सयत गरजेचे उपाय तशेंच जतनाय घेवपाक मजत जातली, अशें मुख्यमंत्री डॉ. प्रमोद सावंत हांणी सांगलां. कांक्र, गोडेंमूत दुयेंतींची तपासणी तशेंच सर्वेक्षण करून हो अभ्यास जातलो. हाचे खातीर भलायकी खातें आनी सेंटर फॉर कॅन्सर एपीडेमीओलॉजी, टाटा मेमोरियल सेंटर आनी ऑक्सफर्ड विद्यापीठ हांचे मदीं समजिकायेची कबलात (एमओयू) जाली.
मुख्यमंत्री डॉ. प्रमोद सावंत हांणी सरकारा वतीन कबलातीचेर सय केली. ह्या वेळार भलायकी मंत्री विश्वजित राणे, भलायकी संचालक डॉ. रुपा नायक, टाटा मेमोरियल सेंटरचे डॉ. राजेश दिक्षीत तशेंच हेर मानेस्त हाजीर आशिल्ले. गोंयांत कांक्रा सयत गोडेंमुताचें (डायबेटीस) प्रमाण वाडत आसा. दिसान दीस प्रदुशणाचें प्रमाण वाडत आसा. कामाच्या ताणां सयत जिणेची पद्दत बदलत आसा. खावपा सयत आहाराची पद्दत वाडत आसा. कांक्र, गोडेंमूत तशेंच क्रोनीक रेस्पिरेटरी दुयेंसा विशीं संशोधन जातलें. हीं दुयेंसां जावपाच्या कारणां सयत प्रमाणाचो लेगीत अभ्यास जातलो.
अजून मेरेन गोंयांत अशे तरेचो अभ्यास जावंक ना. 25 ते 70 ह्या पिराय गटांतल्या 1 लाख लोकांची तपासणी जातली. ह्या सगल्यांचो ब्लड प्रेशर, कोलेस्टोरेल, ग्लुकोजाचें प्रमाण हांचे मेजमाप जातलें. तांच्या घरांतल्या मनशाक आशिल्लीं दुयेंसां, खावपाची पद्दत तशेंच भोंवतणच्या वातावरणाचो अभ्यास जातलो. जिणेची पद्दत, आहार तशेंच पर्यावरण बदल हाचो कितलो परिणाम भलायकीचेर जाता, हे विशींचो डेटा तयार जातलो. कांक्र, गोडेंमूत दुयेंतींचेर उपचार जाले उपरांत कितें फरक पडटा? उपचार खंयच्या पांवड्या मेरेन करप परिणामकारक थारता, हाची म्हायती उपलब्ध जातली.
सरकारान कांक्र दुयेंसाचीं कारणां तशेंच प्रमाणा विशीं अभ्यास करचो, अशी मागणी गोंय कॅन्सर सोसायटीन केल्ली. असो अभ्यास वा संशोधन जाले उपरांत उपचाराची पद्दत तशेंच धोरण निश्चीत करपाक मजत जातली.
खंयच्या वाठारांत क्रांक्र दुयेंसाचें प्रमाण चड आसा, खंयचे पिरायेच्या लोकां मदीं हें प्रमाण चड आसा, आहाराचो कितलो परिणाम जाता, हे विशींची म्हायती उपलब्ध जातली. हो अभ्यास (कोहोर्ट स्टडी) शिक्षणा खातीर लेगीत पुरक थारतलो. मुख्यमंत्री डॉ. प्रमोद सावंत, टाटा मेमोरियलाचे डॉ. राजेश दीक्षित तशेंच ऑक्सफर्ड विद्यापिठाचे तज्ञ हाजीर आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
