भांगरभूंय | प्रतिनिधी
पणजी, प्रतिनिधी : केंद्र आनी राज्यांत भाजपाचें डबल इंजिन सरकार आसा. दोनूय सरकार गुंतवणूकदारांक उर्बा दिवपा खातीर नव्यो येवजण्यो हाडटात. ताका लागून गोंयांत गुंतवणूक करपा खातीर हीच योग्य वेळ आशिल्ल्याचें मत मुख्यमंत्री डॉ. प्रमोद सावंत हांणी उक्तायलें.
सोमारा पणजेे इन्वेस्ट गोवा २०२४चे उक्तावण कार्यावळी वेळ मुख्यमंत्री उलयताले. ह्या वेळार मंचाचेर मंत्री माविन गुदीन्हो, आदले केंद्रीय मंत्री सुरेश प्रभू, उद्देगीक विकास महामंडळाचे अध्यक्ष आमदार लेक्स रेजीनाल्ड, जीसीसीआयचे अध्यक्ष श्रीनिवास धेंपो आनी हेर अधिकारी हाजीर आशिल्ले.
गोंयांत अर्थीक उदरगत आनी उद्देगीक मळार संद वाडोवपा खातीर राज्य सरकार यत्न करता. आमी वेवसाय सुरळीत करपा खातीर विवीध यत्न करतात. उद्देगा खातीर गरजेचे रस्ते, विमानतळ, डिजिटल कनेक्टिव्हिटी हाडल्या. रोजगारा खातीर कुशळटाय विकसीत करपाक आमी विंगड विंगड नामनेच्या संस्थां वांगडा करार केल्यात. गोंयांत जगपाचो दर्जोय बरो आसा. ह्या सगळ्या गजालींचो उद्देगांक नक्की फायदो जातलो, अशें मुख्यमंत्र्यान फुडें म्हणलें.
गुंतवणूकदारांनी गोंयां कडेन फकत पर्यटन स्थळ म्हणून पळोवचें न्हय. तांणी गोंयां कडेन उदयाक येवपी नवी शक्त म्हणून पळोवचें. गुंतवणूकदारांनी गोंयांत येवचें आनी स्वता वांगडा राज्याचीय उदरगत करी. तुमच्या येसांतूच आमचेंय येस आसा. गुंतवणूकदारांक आमी येवकार दितात. तांकां कसलेय तरेची मजत करपाक आमी तयार आसात. इन्व्हेस्ट गोवा हो फकत इव्हेंट न्हय गुंतवणूकदारां खातीर एक आस्वासन जावन आसा, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
