भांगरभूंय | प्रतिनिधी
धा वर्सांचो नियाळ; मुरगांव, बार्देस, साश्टी, तिसवाडी म्हालांचो आस्पाव
पणजी: राज्यांत गांवगिर्या वाठाराचे तुळेन शारी वाठारांत एचआयव्हीची बादा चड आसा. 2014 ते 2023 ह्या धा वर्सांत दिसून आयिल्ल्या वट्ट एचआयव्ही बादितां मदीं 54.85 टक्के बादीत हे मुखेलपणान चार म्हालांतले आशिल्ले. हातूंत मुरगांव, बार्देस, साश्टी आनी तिसवाडी ह्या दर्यादेग वाठारांतल्या शारी म्हालांचो आस्पाव आसा. ते तुळेन धारबांदोडें, सत्तरी, काणकोण, सांगें ह्या गांवगिर्या म्हालांत एचआयव्ही बादितांची संख्या खुबूच उणी आसा.
भलायकी खात्या कडल्यान मेळिल्ले म्हायती प्रमाण राज्यांत 2014 ते 2023 मजगतीं वट्ट 3112 एचआयव्ही बादीत सांपडिल्ले. हातूंतले 1707 बादीत हे मुरगांव, बार्देस, साश्टी आनी तिसवाडी म्हालांतले आशिल्ले. ह्या काळांत मुरगांव सावन सगल्यांत चड 514 दुयेंती (16.51 टक्के) सांपडिल्ले. उपरांत बार्देस सावन 446 (14.33 टक्के), साश्टी सावन 415 (13.33 टक्के), तिसवाडी सावन 340 (10.92 टक्के) दुयेंती सांपडिल्ले. वयल्या काळांत हेर खंयच्याच म्हालांत एका वर्सांत इतले दुयेंती सांपडूंक नाशिल्ले.
शारी म्हालाचे तुळेन गांवगिर्या म्हालांतल्या एचआयव्ही बादितांची संख्या उणी आसा. 2014 ते 2023 मजगतीं सांपडिल्ल्या वट्ट दुयेंती मदीं धारबांदोडें सावन सगल्यांत उणे 19 (0.61 टक्के) बादीत सांपडिल्ले. उपरांत काणकोण सावन 40 (1.28 टक्के), सत्तरी सावन 50 (1.60 टक्के) सांगें सावन 70 (2.24 टक्के) दिवचल सावन 78 (2.50 टक्के) जाल्यार फोंडें सावन 165 (5.30 टक्के) दुयेंती सांपडिल्ले.
25 टक्के बादीत राज्या भायले
राज्यांत 2014 ते 2023 ह्या काळांत 3112 बादितां मदीं 774 बादीत (24.88 टक्के) हे गोंया भायले आशिल्ले. हातूंत हेर राज्यांतली व्यक्ती, विदेशी नागरीक वा जांणी आपलें मूळ राज्य सांगूंक ना अश्या व्यक्तींचो आस्पाव आशिल्लो. 2014 ते 2020 मजगतीं म्हाल निहाय बादितांची तुळा करीत जाल्यार गोंया भायल्या व्यक्तींक एचआयव्हीची लागण जावपाचें प्रमाण चड आशिल्लें. 2021 ते 2023 मजगतीं हें प्रमाण उणें जायत आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
